Pathianni zan khan Anfield-ah Liverpool leh Manchester United an inhmachhawn a, inkhel hmuhnawm takah team hnih te 2-2 in an inhnehtawk. 

An result-ah United boss Ruben Amorim a lawm tawk lo a, point 1 lek hlawhchhuak tur niin a inngai lo. Chutih laiin Portuguese coach hi an khelh danah erawh a lawm hle thung a ni.

Anfield-a inkhel hmuhnawm takah hian first half-ah goal a lut lo. Second half minute 52-ah Lisandro Martinez chuan hnai set sawt atangin kawh zetin United goal hmahruai a khung.

Rei an khelh hmain minute 59-ah Cody Gakpo chuan box veilam sir atangin mawi lutukin an siphurh a rul a, de Ligt handball avangin Liverpool chuan penalty an hlawhchhuak chhunzawm, hei hi Mo Salah chuan goal-ah a chantir, 2-1 in Liverpool chuan hma an hruai.

United an beidawng lo, minute 80-ah mual veilam sir atanga Garnacho cross chu Amad Dialo chuan a chhuih lut ve leh a, hun tawp dawn tak takah Zirkzee cross chu Harry Maguire chuan hnai set sawt atangin a chhuih goal lo, team hnih te 2-2 in an inhnehtawk ta a ni.

Manchester United boss Ruben Amorim chuan, "Point hlawhchhuah kan phu a, mahse chu aia tha hlawhchhuak thei kan ni. Kan khelh danah ka lawm em em a, kan result hlawhchhuahah erawh ka lawm tawk lo a ni.

"Game dang zawng aiin kan tang zawk a, Newcastle, Bournemount leh Nottingham kan hmachhawn dan nena khaikhin chuan, Anfield-a kan game kha a danglam daih a ni.

"Khelh dan system leh technique lam a ni lo, kan khelh dan kha a danglam, a chhan chu kan theihtawp kan chhuah vang a ni. Liverpool kan hmachhawn chuan khatiang khan kan khel ziah ang.

"Team dang kan hmachhawn pawhin khatiang khan khel thei ila chuan kan danglam khawp ang. Chak kan duh a, kan theihna zawng zawng kan chhuah a, kan khelh danah ka lawm a, mahse kan result hlawhchhuahah erawh ka lawm tawk lo a ni," tiin a sawi.

United captain Bruno Fernandes pawhin, "Table-a kan awmna en chuan, sawisel pawh kan phu khawp mai. Points kan hloh hnem malh malh em a ni.

"Liverpool laka point khat kan hlawhchhuah avang khan kan lawm tawk lo, chu aia tha chu kan phuin ka hria. Kan khelh dan kha a lawmawm a, khatiang khan kar tin khel thei ngat ilang chuan kan dinhmun a tha khawp ang.

"Liverpool hi league hmahruaitu an ni a, team tha tak an ni. Chutih laiin kan hmachhawn thei khawp mai. Kan khelh danah kan lawm a, hei aia result tha hlawhchhuah phuin kan inhria a ni," tiin a sawi ve bawk.