15 Apr 2019 05:06

inkhel

Pogba World Cup boot £40,000 in an lilam dawn

Paul Pogba chuan FIFA World Cup-a football boot a bun chu lilam a tum a, a hralhna hi tanpui ngaite tanpuina atan hman a tum.

Nikuma World Cup champion team France tana khel Paul Pogba chuan Russia rama a football boot bun chu lilam a rilruk a, £40,000 (Rs. 36,36,780/-) vel tala hralh theih a tum a. A football boot hi a hralh thei ta a nih chuan a pawisa hmuh hi midangte tanpuina atana hman turin pek a tum a ni.

Manchester United star hian World Cup final-a 4-2 ngawta Croatia an hneh khan France goal thumna chu a thun a, an ram chu a vawi hnihna atan World Cup champion a nihpui a. Final-a goal thunna atana a hman, football boot a bunah hian a hming a ziak nghe nghe a, hei hi lilamna hmun lar tak maiah an lilam ang.

Pogba boot chu Paris khawpuia lilamna hmun lar Christie’s ah an lilam ang a, a boot man hi £25,000 leh £43,000 inkar bawr vel ni tura beisei a ni a. An sum hmuh chu Les Etoiles de la Source hnenah a hlan dawn a, he pawllah hian Pogba chu honorary president a ni nghe nghe a ni.

Kum 26-a upa Pogba hian Les Etoiles de la Source hnenah hian a hma pawhin a kawr paruk leh a hming ziahna Champions League ball te pawh a lo hlan tawh bawk a ni.

United star Pogba chuan, “He pawl tan hian theihtawp chhuah zel ka duh a, ka theih ang tawkin an tan ka inpe a ni tih ka sawi duh a. Naupangho, harsatna tawkte tanpui turin theihtawp an chhuah thin a, hna ropui tak mai an thawk reng a. Hetianga theihtawpa mite tana an inpekna kawnga tha ka lo thawh ve thei hi ka lawm a ni,” a ti.

“Paris khawpui chhunga mi harsa deuh awm hnemna Roissy-en-Brie a seilian ka ni a, hei vang hian eizawnna lama hlawhtlin hi a harsat zia ka hre chiang a. Heng thalai harsatna neite hian lei rem an rah theihna tur a nih chuan kawng kawhhmuh theih zel hi ka duh ve a ni,” a ti bawk.

Ruahman anga thil an kalpui thei a nih chuan Paul Pogba boot hi April 29 hian an lilam dawn a ni.

Les Etoiles de la Source hian infiamna kaltlangin inpawhna leh inlungrualna thlentir an tum ber a. Naupang leh thalai kum 12 atanga kum 25 inkar, an chawr chhuahnain a zir loh avanga kawng hrang hranga harsatna tawkte tan kawng an zawnpui thin a. A khat tawkin heng mite tan hian hnam thilah te leh infiamna lamah te inelna an buatsaih fo thin.