13 Aug 2019 08:30

inkhel

Pogba thinlung hi United-ah a awm vek lo: Ince

Paul Ince chuan Paul Pogba thinlung chu Manchester United-ah a awm pumhlum lo nia sawiin, hmun dang pan a inring reng niin a sawi.

Paul Pogba chuan kumin nipui chhungin chanchin a ngah hle a, Old Trafford chhuahsan mai tur angin thu a thang deuh reng bawk a. Club hrang hrang nen an sawi zawm nual a, heti chung hian mumal taka lei chhuah tuma dawrtu an awm chiah lo thung.

Premier League transfer window chu an khar tawh a, Manchester United-in season bul tanna atana an game hmasa berah 4-0 ngawtin Chelsea an sawp a, he inkhelah hian Ole Gunnar Solskjaer chuan Pogba hi bul a tantir a ni.

France midfielder Pogba chu Chelsea an hneh tum hian a che chhe lem lo hle a, Marcus Rashford leh Daniel James te goal thun theihna kawngah a inhnamhnawih nghe nghe a. Heti chung hian Paul Ince chuan United midfielder hian hmun dang pan dan kawng a la dap reng tho nia a ngaih thu a sawi chhuak.

Ince chuan, “Inkhelh hma khan Paul Pogba rilru put dan tur kha ka ngaihtuah a, eng angin nge United tantute pawhin an lo dawnsawn ang tih te kha ka ngaihtuah nasa hle,” a ti.

“Kumin nipui laia a chet dan hi a dik lo viau a, chhuah a duh thu a sawi chhuak zui lehnghal a. Khatiang tawngkam a lo neih tawh bawk avang khan club tantute’n engtin nge an lo tih ang tih kha ka rilruah a lian hle a. Amaherawhchu, mipui lamin an lo dawngsawng tha hle a, lawm viau tur a ni ringawt,” a ti bawk.

A sawi zelnaah, “Team tantute chet dan kha fak loh theih a ni lo a, khatianga a awm tawh hnuah pawh tha em emin an lo dawngsawng thei a. A nihna takah chuan amah ber pawh khan khelmual chhunga a luh dawn khan nuam tih lohna a neih ve ngei ka ring,” a ti a.

“Player dangte pawh kha Pogba boruak khan a nghawng tel ve tho a. Anni rilruah pawh eng boruakin nge lo hmuak tih kha a lian ve hle dawn a, mi mit fukna ber a ni tih kha an ngaihtuah thiam ve vek a ni,” a ti bawk.

Paul Ince chuan, “Paul Pogba thinlung hi Manchester United-ah a awm vek lem lo tih chu a chiang mai a. Chelsea nen an inkhelh lai pawh khan a rilru chu hmun dangah a awm zeuh zeuh tih a hriat a, a khelh dan atangin a hriat theih vek a. Ram hrang hranga transfer window an khar kim vek hunah chauh ngaihngam takin United hi an awm thei dawn chauh a ni,” a ti.