Premier League inkhelah Manchester United chuan Old Trafford-ah West Ham an lo mikhual a, United hi 2-1 in an chak a, point thum hlu tak an hlawhchhuak.
United tan Paul Pogba chuan penalty spot atangin vawi hnih a pet goal a, West Ham tan Filipe Anderson chuan goal a khung ve bawk.
United hian khelh 33-ah point 64 an hlawhchhuak tawh a, panganaah awm mekin an chung chiaha awm Chelsea chu point hnihin an pha lo. West Ham lam hian khelh 34-ah point 42 hlawhchhuak tawhin 11-naah an awm mek a ni.
Manchester United 2-0 West Ham
(Pogba 19’ pen, 80’ pen) (Anderson 49’)
PLAYER RATINGS
Manchester United: De Gea 6, Dalot 6, Jones 6, Smalling 6, Rojo 5, Mata 6, Fred 6, Pogba 6, Lingard 5, Lukaku 6, Martial 6. Subs: Andreas 6, Greenwood 6, Rashford 7.
West Ham: Fabianski 6, Zabaleta 7, Ogbonna 6, Balbuena 6, Masuaku 7, Rice 8, Noble 6, Snodgrass 7, Lanzini 7, Anderson 7, Hernandez 6. Subs: Fredericks 5, Diangana 7, Antonio 7.
Match Report
Manchester United hian 4-2-3-1 formation an hmanga, David De Gea chuan si ban nghakin tlar hnungah Diogo Dalot, Chris Smalling, Phil Jones leh Marcos Rojo-te an intlar. Midfield-ah Pogba leh Fred te an awma, hmatawngah Romelu Lukaku maltlat tir niin Lukaku hnung chiahah Juan Mata awmin Anthony Martial leh Jesse Lingard-te a sirah dah an ni.
West Ham lamin 4-1-4-1 formation an hmanga, Arsenal goalkeeper hlui Lukasz Fabianski chu si ban nghah tir niin tlar hnungah Pablo Zabaleta, Balbuena, Ogbonna leh Masuaka-te an awm. Defence hma chiah; holding midfield role-ah Declan Rice awmin,Rice-a hmaah hian Robert Snodgrass leh Mark Noble dah an ni a, wing-ah Lanzini leh Anderson awmin, hmatawngah Manchester United striker hlui Javier Hernandez dah a ni.
Inkhel tan a ni a, team hnihten inkhel hmuhnawm thawkhat tak min hlui a, minute sawm vel khelh a nihin Hammers lamin goal an khung emaw an ti hman; Masuaku chuan veilam atangin United box chhungah ball a vawrh lut, Chicharito chuan leiah ball lo tauh sawtin hnai set sawt atangin Anderson chuan chiang takin goal-ah lo pet lut mahse Anderson hi a offside hlauha, goal-a pawm a ni lo. Replay-a chiang zawk a lan danin Anderson hi Chicharito-a’n ball a tauh hian a offside lo chiah chiahin lang mahse lines-man in a phar a, offside anga kaltlangpui niin, khawi lam zawk zawk pawhin a pek theih awm e.
Minute sawmhnih khelh a nih hma deuhin United lamin penalty an hlawhchhuak a, Hammers box chhunga awm Martial chuan box chhunga rawn tlan lut tur Mata chu ball a pe a, Mata ball la tur chiah hi Snodgrass chuan an box chhung vel chiah chiahah a ti tlu, referee chuan Hammers hi penalty a chawi tir a, penalty spot atang hian Pogba chuan goal-ah chantirin United –in hma an hruai.
Minute sawmhnih chuang khelh a nihin Hammers in corner an hmu a, Snodgrass chuan corner atang hian box chhungah ball vawrh lutin Anderson chuan a lo tauha, a goal teuh angreng hle. Hemi hnu lawk hian Pogba chuan Hammers box chhung atangin hun tha nei mahse goal-ah a chantir thei lo. Half time hma deuh lawkin Anderson chuan an si phurh sutna hun tha tak nei mahse De Gea a paltlang zo lova, first-half ah goal khat bak lut lovin 1-0 in tihtawp a ni.
Second half tan a ni a, Hammers lamin minute nga pawh khelh a nih hma in an si phurh an sut; De Gea chuan ball a pass chhuak chhe hle a, Hammers lamin ball changin United box chhung veilama inpawt Lanzini chu ball pek a ni a, Lanzini hian far post lama awm Anderson pe ve lehin, Brazilian player hian United goal-ah ball lo tlawhin De Gea chuan khawih hman mahse goal-ah a lut ta tho va, 1-1 a ni.
Darkar khat khelh a nih hma deuhin second half-a rawn lut Marcus Rashford chuan chance tha tak a nei a, Smalling chuan Rashford hi through ball tha tak a pe, Rashford hian ball hi box chhungah luhpuiin dinglam deuh hret atangin goal-ah pet mahse Fabianski chuan a lo save.
66mins-ah Rojo chuan box pawn atangin Hammers goal-ah ball chu lei hrulah na takin a chhuih a, mahse Fabianski-a tan thil harsa lutuk a awm lo. Minute sawm vel a ral lehin West Ham lamin hma an hruai teuh kher mai; Antonio chuan ball khalhin, United box pawn chiah atangin a ke veilamin ball chu a chhuiha, De Gea chuan a ban pha lo, mahse Hammers an vanduai a goal bar a per dawt.
Goal bar a pet per hnu lawkah Antonio bawk chuan chance tha em em a nei leh a, Diangana hnen atanga a kanga ball a hmuh chu hnai set sawtah Antonio chuan United goal-ah a lo tauh a, ball hi tauh sawtin a goal dawn emaw tih hnuah De Gea chuan tha em em in a rawn save.
80mins khelh a ni chho va, United-in penalty dang an hlawhchhuak leh; Anthony Martial chuan ball khalhin Hammers box chhungah a luh puia, Fredericks chuan Martial hi a hnunglam atangin a rawn kherh thlu; United-in penalty an hlawhchhuak leh a, Pogba bawk chuan penalty spot atang hian goal-ah chantirin tun Premier League season kal mekah goal 13 a khungna a ni a, goal sarih chu penalty spot atanga a thun vek an ni.
Inkhel a hmuhnawm a, Hammers an theuneu lo. United hi an vannei a tih theih a, Poga penalty goal hnih hmanga chak hramin 2-1 in inkhel tihtawp a ni.