​Pogba manah City-in £71m thehchhuak !

29th June 2015, 02:06AM

Manchester City chuan Juventus midfielder Paul Pogba lei chhuah nan Juve-in a man an chhiar zat £71million an thehchhuak dawn niin Sunday Mirror chuan an tarlang.

Juventus hian French midfielder hi €100million (£70.92million) lai an chhiar a, Manchester City hian an lei thei dawn lo niin mi chuan an ngai tawh, mahse club hausa Manchester City tan sum lamah buaina tur a awm lo, City hian Pogba manah £71million lai an thehchhuak nia tarlan a ni a, City hian Pogba thutlukna an nghak mek.

Manchester City hian Pogba hi an chang ngei dawn niin an inngai a, hetih lai hian mumal takin Pogba hlawh tur leh inremna tur an la buaipui lo nia report a ni a, City leh Pogba agent Mino Raiola te chu khunkhan takin an lo indawr tawh a, City hian kum 22 French international hi an lei thei a nih ngat chuan kar khatah £240,000 lai pek an inhuam.

Manchester City hian official taka £71million-a Pogba an dawrna tur hi an la thehlut lo niin Mirror chuan a tarlang a, Amah Pogba hian City lam pan a hnial loh chuan Man City hian Pogba manah official takin Juventus duhthusam ang ngeiin £71million an thehchhuak dawn nia report a ni.

Pogba hi Manchester City mai bakah Barcelona, Real Madrid, PSG leh Chelsea te pawhin an hel ve reng a, mahse Premier League title an humhim zawh loh hnuah Man City hian team dinthar an tum ruh hle a, Champions League-ah Europe club lian an nih zia tarlan tumin hma lak an tum bawk. Hengte anih avang hian 2016 January thla thlenga Juventus-a contract nei Pogba chu team thuam that nan lak tumin theih tawp an chhuah mek a ni.

Manchester City hian Liverpool forward Raheem Sterling chu £40million velin dawr mahse Liverpool hian £50million aia hniam chuan hralh an lo tum hauh lo mai. Hei vang hian a thiamna leh a man chhutin City hi an inhnukdawk titih deuh niin a lang. Manchester City hian player tha an dap zel a, Belgian playmaker Kevin De Bruyne chu £35million velin Wolfsburg an dil mek a, De Bruyne hian a club-in contract thar an zawrh chu a hnawl tawh nghe nghe a, England lam a pan leh ngei rin a ni.

Copyright © inkhel.com 2024. All rights reserved.