Manchester United chuan Paul Pogba chu tun season bak chelh zui vak an rilruk tawh lo a nih hmel a, France midfielder man atan hian £200 million an chhiar thu an sawi.

Jose Mourinho leh Paul Pogba te inkar chu a chhiat belh zel a, Inrinnia Wolverhampton Wanderers nen Old Trafford-a an inhnehtawk hnu khan Pogba chuan Mourinho khelhtir thin dan chu nasa takin a sawisel a. Hemi hnuah hian Mourinho pawhin Pogba chu captain a nihtir tawh loh tur thu a sawi zui bawk a ni.

Pogba leh Mourinho te pahnih inkar boruak chhe mek piahlamah hian Pogba chuan Old Trafford chhuahsan a duh thu a sawi ri leh thin a, heng avang te hian club lam chuan chhuahtir mai hi an rilruk ta niin a ngaih theih a ni.

Portuguese boss Mourinho chuan Pogba hralh hi pawi a ti vak lo niin an sawi a, hetiang a nih takah chuan club hian Pogba man atan world record siam thei tur an chhiar ta niin an sawi.

Paul Pogba hian Manchester United ah hian kum thum chhung atan contract a la nei a, an duh a nih phawt chuan Pogba hi an la chelh zui zel thei a. Mahse, player lungawi lo kawl reng chu an duh bik lo niin a ngaih theih a, Pogba agent Mino Raiola pawhin sum hlawm lian deuh khawih chet theih a duh ve bawk a ni.

Hetiang thawm a awm takah chuan Barcelona chu an chet zui a rinawm ve thei a. A hma atangin Barca hian Pogba hi an lo thlithlai tawh a, Pogba lah hian Barcelona lam pan chu a chak thu a lo sawi ve leh thin a. Club te an inrem thei a nih ngat chuan Pogba hian Camp Nou lam pan chu a hnial a rinawm loh hle.

Khawvela player man to ber ni mek chu Brazilian star Neymar a ni a, Paris Saint-Germain chuan £198 million in an lei a. United in Pogba man an chhiar zat hian eng club berin emaw an lei a nih chuan Neymar chu a khum thei dawn tihna a ni a. Vawi hnih chu khawvela player man to ber a ni thei dawn tihna a ni ang.