Paul Pogba chu Manchester United player ropui tak Roy Keane leh Eric Cantona te anga hruaitu tha a nih loh thu Andrei Kanchelskis chuan sawiin, tun aiin nasa takin hma a la sawn thei tih a sawi.

Jose Mourinho chhuah hnuah Ole Gunnar Solskjaer hnuaia harh tharna chang mek Paul Pogba chuan a dinhmun a siam tha chho zel a. Tun hnaia game 11 khelhah goal 9 ngawt a thun thei a, mi goal thun tur pawh a siamsak nual bawk a ni.

Paris Saint-Germain nen UEFA Champions League a an inkhelh tumin red card a hmu a, hei vang hian second leg-ah chuan a tel ve thei dawn lo a. Pathianni hian Liverpool nen an inkhel dawn a, hetah hian eng ang taka tha nge a nih tih chu a lantir theih a rinawm a ni.

Manchester United winger hlui Andrei Kanchelskis chuan, “Mi zawng zawngin Paul Pogba chanchin an sawi a, game liana a chet thin dante an sawi nasa hle a. Tunah chuan Liverpool hmaah a ding dawn a ni a, eng ang takin nge game lianah a khelh tih te leh team tha deuh hmaah eng angin nge a chet tih chu kan hre thei ang,” a ti.

“Tun dinhmunah chuan Pogba hi hruaitu a ni lo chiang hle a. Tun hma deuhin Roy Keane te, Steve Bruce te leh Eric Cantona te kan nei thin a, anni kha hruaitu tha tak an ni a. Tunah tak hi chuan Manchester United hian hmana hruaitu tha ang kha an nei lo a ni,” a ti bawk.

Tun hnaiah United chuan player pakhat chauha innghat loin, khelmualah team an nihzia an lantir nasa chho hle a. Paul Pogba mai bakah Anthony Martial leh Marcus Rashford te chu an che tha chho hle a. Solskjaer hnuaia game 13 an khelhah vawi 11 an chak thei a ni.

A vanglaia Everton tan pawha lo khel tawh Kanchelskis chuan Pathiannia Liverpool an hmachhawn hunah United chu chak ngei se a duh thu a sawi a, Liverpool in title lak an tumna chu United hian tihchhiatsak se a duh thu a sawi a ni.