Manchester United interim manager Ole Gunnar Solskjaer chuan Paul Pogba chu dressing-room leh khelmual chhungah hruaitu tha tak a nih zia a sawi.

OGS chuan, “Pogba hi top player a ni tak meuh meuh a, a naupan laia a khel ka hmuh atang khan ka ngaina tawh. World Cup winner a ni a, dressing-rrom ah hruaitu tha a nih bakah khelhmual chhungah pawh hruaitu tha a ni.

“Pogba hian engtik lai pawhin ball a duha, a theihna zawng zawng phawrh chhuah sak hi ka thil tum a ni a, ka ngaihdanah chuan attacking midfielder a ni. PSG khan an ‘man-mark’ a , club dang pawhin chutiang chuan a ti ve ngei ang.

“Liverpool hian an ti dawn em ka hre lova, an ti a nih chuan midang tan hmun awl a tam phah dawn a, chumi tur chuan kan inrin a ngai a ni,” a ti.

Manchester United hian an hmelma hlun Liverpool chu tun Sunday hian Old Trafford-ah an lo mikhual dawn a, inkhel hmuhnawm tak a nih ngei a rinawm. Season chawhma lama he fixture hi Anfield-a khelh a nih khan Pogba hi bench-ah a awm tluana, Solskjaer-a hnuaiah erawh a khel ngei dawn a ni.

Pogba hian manager kalchhuak ta Jose Mourinho duhsak a hlawh lo hle a, a khelh chhunah pawh a khel chhe thin hle bawk. Season tir lamah sawisel a hlawh hman hle a, mahse nikum December-a OGS-a'n United a enkawl hnuah Pogba hian harhtharna changin United innghahna ber a ni mek ti ila kan sawi sual tam in a rinawm loh a ni.