16 Oct 2020 04:47

inkhel

Pogba chu kum hnih a la awm dawn: Solskjaer

Ole Gunnar Solskjaer chuan Real Madrid pan tur anga an sawi Paul Pogba chu kum hnih chhung an la kawl dawn niin a sawi.

Manchester United in an club record siama £89 million zet senga an lak luh, French midfielder Paul Pogba chu Santiago Bernabeu nen an sawi zawm nasa hle a. Tun hnaiah thawm hi a ri thar leh mek a, Zinedine Zidane kaihhruaina hnuaia awm a duh niin an sawi a ni.

Paul Pogba agent Mino Raiola pawhin French midfielder chu Old Trafford atanga chhuah a duh thu a sawi chhuak tawh bawk a. Hetiang thu thang karah hian Manchester United manager Ole Gunnar Solskjaer chuan an player chu a chhuah dawn loh thu a sawi ve thung a ni.

Solskjaer chuan, “Paul hi Manchester United player a la ni a, Old Trafford-ah hian kum hnih chu a la awm dawn a. He club tan hian theihtawp a chhuah zui zel hi kan ring tlat a ni,” a ti.

“Kei ni pawhin a tana tha ber tur hi kan duh a, tun atanga kum hnih chhung vel hi chuan eng ang taka tha nge a nih tih hi kan hre ngei dawn a. Thu thang neuh neuh tam viau mah se hmun dang hi a la pan dawn lo a ni,” a ti bawk.

Tun season tawpah Pogba chuan a contract a hmang zo tawh dawn a, hetih rual hian Manchester United hian an duh phawt chuan thla 12 chhung chu a contract hi an la pawt sei thei dawn a ni.

Tun hnaia Marcus Rashford-a chawimawina dawn chungchangah Solskjaer chuan a ngaihdan a sawi chhuak bawk a. Khawvel hriata an player hnathawh a lar chho chu an lawmpui thu leh chhuanawm a tih thu a sawi chhuak.

“Marcus-a’n hriat a hlawh hi a lawmawm kan ti hle a, kan chhuang hle a. Amah mai bakah a chhungte pawh an lawm viau kan ring a. Manager ka nih angin eng ang taka pa tha nge a nih tih hi ka hre chiang a, mi dangte a ngaihtuah dan pawh ka hre chiang viau bawk a. Khelmual chhung leh pawna hma a lakna duhawm tak hi chhunzawm zel se kan duh a ni,” tiin Rashford chu duhsakna a hlan a ni.