Paul Pogba agent Mino Raiola chuan Manchester United chu French midfielder enkawl dik loah puhin, 2016 a Old Trafford a luhchilh atang khan a beisei angin club an awm lo niin a sawi.

Mino Raiola chuan nipui hunah Paul Pogba chu club dangah a insawn tawh maithei nia sawiin, nikum nipui transfer window inhawn lai pawh khan club danga chhuahna tur a zawnsak nasa hle niin a sawi bawk.

Real Madrid leh Juventus te chuan Manchester United midfielder Pogba hi an ngaihven hle a, kumin nipui transfer window a inher chhuah hunah chuan Red Devils hian an chelh zui thei tawh kher lo maithei a ni.

Raiola chuan, “Paul hi he club-ah hian a hlim tawh lo hle a, a duh angin a khel tam thei meuh lo a, tunah chuan hma a sawn zel theihna turin a inenkawl mek a. A inkhelh tam loh chuan a hlim ngai lo,” a ti.

“Mi tam zawk chuan Manchester United a pan an ring lo a, chuti chung chuan Old Trafford lamah a insuan lut a. Club dang tam tak pawhin an beisei laiin amah hian Manchester United a thlang a ni,” a ti bawk.

A sawi zelnaah, “Beiseina sang tak nei chung leh ruahmanna duhawm tak nei chungin Manchester United a zawm a, helai hmuna a awm hnuah a beisei angin thil a kal lo hle a. A hmathlir ang kha club hian an ngaihsak lem lo a ni ber a, hei vang hian a rilru a hnual phah hle,” a ti.

“Hetianga rilru thuhmun pu lo chunga inhrawn reng hi a fuh lo a, nipui transfer window inhawn hmain Paul Pogba hi Manchester United ruahmannaah a la tel em tih leh, Manchester United hi Paul Pogba ruahmannaah a la tel em tih te chu hriat chian hman a ngai dawn a ni,” tiin a sawi.

France midfielder Paul Pogba hian Old Trafford-ah kum khat chhung contract a la nei a, kum 26-a upa hian a contract pawh sei belh a tum hmel lo hle a. Juventus player hlui hian tun season-ah Premier League game 7 chiah a la khel a ni.