Manchester United ngaisangtu, World Cup 2018 ambassador ni bawk Victoria Lopyreva chuan tun hnaia United atanga Paul Pogba chhuak dawn ni awma thu a thang reng chungchang sawiin, a thianpa Pogba chu hmun dangah a chhuak dawn lo niin a sawi.

Pogba hi United manager Jose Mourinho nen an inkar boruak a fuh lo viau mai a, hei vang hian Portuguese boss hian inkhel pawimawhah bul a tantir lo fo ta mai a. Pogba hian a khelh tam theihna hmun a pan mai ringtu an tam hle a, engmah thu chiang erawh a la awm lo.

Miss Russia 2003 Lopyreva hi Manchester United tantu niin, French star Pogba nen an inhmelhriat bawk a. Juventus player hlui hian Old Trafford a chhuahsan a rin loh thu sawiin, United tana player pawimawh berte zinga mi a nih zel tur thu a sawi.

Lopyreva chuan, “Mourinho hi chak duh mi a ni a, chak hi a nih dan turah a inngai tawh a. Pogba hi player zawiawi tak mai niin, a chang chuan mi pahnih, mize ropui deuh deuh an awm dun chuan boruak inhmu fuh chiah lo a awm phah thin,” tiin Mourinho leh Pogba inkar chungchang a sawi.

“Tuna an inkar boruak fuh vak lo hi Pogba tan chuan chhuah phahna tham a tling loin ka hria a. Manchester United tantu ka nihnaah leh ka duhthusamah chuan Pogba hi chhuak lo se ka ti a. Dik tak chuan Pogba tel loa United kal zel tur hi ka ngai ngam ngang lo a ni,” a ti bawk.

Victoria Lopyreva hi Miss Russia 2003 a nih bakah actress, presenter leh model a ni bawk a. Russia ramah chuan a lar hle a, ngaihsan pawh a hlawh viau bawk a, ‘Face of Russia 2018’ an ti hial a ni.