German striker ram tana inkhelh chawlhsan ta Lukas Podolski chuan England football team khelh thin dan chu rugby team ang mai an nih thu a sawi. Arsenal tan pawha khel tawh Podolski hian ram tan game game 130 khelin goal 49 lai a khung hman a ni.
2006 World Cup-a Best Young Player atana thlan Podolski chuan, "Tunah chuan team tha tak leh manager tha tak an nei tawh a ni. Hmanah kha chuan rugby team ang deuh an ni, tunah chuan hma an sawn khawp mai. Tharum la hmang nasa viau mahse football awmze nei zawk an khel tawh a ni. Tournament reng rengah an hlauthawng thei em em a, nimahsela 2018 World Cup-ah chuan England team hi ka en bik ang," tiin England chuan football awmze nei zawk an khelh tan tih a sawi.
English chanchinbumite an lian a, English rawlthar game hnih khat khel tha tan dek dek chu an fak hluai zel. Khawvela league en hlawh ber Premier League-ah English mi an tlem tial tial a, tun hnaiah FA a thangharh avangin English naupang hmabak eng tak tak an rawn chhuak chho veleh tan tawh a ni.
World Cup a ni emaw European Championship-ah pawh nise England team chu champion rinkai ber angin an chhuah ziah emaw tih mai tur a ni a, England player-te lakah pressure a nasa thin hle. England 'Golden Generation' an tih mai: Paul Scholes, Ashkey Cole, David Beckham, Steven Gerrard, Frank Lampard, Rio Ferdinand, John Terry, Sol Campbell, Michael Owen leh Gary Neville-te vanglai pawin quarter final bak an thleng thei ngai lo.
Heng player-te hian an chanchin an ziahnaah chuan an laka pressure nasat thu an ziak lang nasa hle a, Brazilian player-te engthawl taka an khelh theih laia nuam ti taka an khelh theih ve loh thu an tarlang a ni.
Tun hnaiah England-in player tha an chherchhuak veleh tan a: John Stones, Raheem Sterling, Ross Barkley, Marcus Rashford, Eric Dier, Delle Alli, Jack Butland, Harry Kane-te hi player naupang tak vek an la ni. England enkawl mektu Gareth Southgate hi England that vangalaia ram tana khelh phak a ni a, tun hnaia chanchinbumite a kawmnaah England team chuan rilru thar an put a ngaih thu thliarkar rilru an paih a ngaih thu a sawi nghe nghe. Germany laka huaisen takin an khel a, Germany team tha ber hmachhawn lo mahse England khelh danah lawmna tur tam tak a awm tih theih a ni. Podolski sawi tak angin England hian football awmze nei zawk an khel mek a ni.