02 Dec 2019 11:35

bakteaJr.

Mizo tlangval

​Pochettino chawlh rei a tum lo

Tottenham-in thla hmasa laihawla an ban tak Argentine manager Mauricio Pochettino chuan chawlh rei a tum loh thu a sawi a, club thar a nei thuai dawn niin a lang.

Pochettino hi a ram Argentina lamah chawlh hmangin a haw a, ni 10 vel cham tawhin Europe lamah chona thar hmachhawn turin a lo kir leh thuai dawn niin a langa, dawrtu itawm tak tak pawh a nei nual tawh tih Pochettino hian a sawi.

Pochettino hi Bayern Munich leh Arsenal nen sawizawm an ni nasa hle a, Bayern leh Arsenal te hian tunah hian manager nghet nei lo ve ve in, an assistant manager-te enkawlna hnuaiah an awm ve ve.

Kum 47 mi hi Manchester United nen pawh sawizawm a ni a, Barcelona leh Real Madrid hming te pawh lam rik a ni fo bawk. Pochettino hian manager angin trophy chawi la nei lo mahse team lian tak a la enkawl lo ngai lova, a team enkawl te erawh an tiatpui aia lian elpha in a siam ziah thung a tih theih awm e.

Pochettino chuan, “Club tam tak itawm tak taka min dawrtu an awm nuala, mahse tunah chuan ka tana tha ber chu kum nga leh a chanve Tottenham ka lo enkawl tawhna atanga ka rilru tih fim hi a ni. Ka insanmar a ngaia, ka phurna hi ka chawhchhuah thar leh a ngai in ka hria.

“Manager hna thawk tura Europe-a kir leh ngei erawh ka tum a, Argentina-a thawh lam chu ka rilruah a la lang rih lova, mahse ka chhungte avang hian Argentina-a thawh pawh ka hreh chuang lo.

“Ni reilo te chhung chu zalen taka ka awm rih a ngai ve a, chumi hnuah eng nge lo thleng zel dawn chu kan hre chho mai ang. Ka chunga thil thleng hi fim taka ngaihtuahna hun ka la nei lova, ka tum hmasak ber kha chu Argentina-a lo kira, ka ina haw a, ka chhungte leh ka thiante hmuh a ni.

“Argentina-ah ni 10 vel awm hahdam tura lo kir kha ka rilru hmasa ber a ni a, ka hmalam hun erawh Europe-ah a awm ngei ka beiseia, ka kum angah hian hun rei chawlh a la ngai lova, ka hmaa thil awm apiangah bengchhit ka hreh lo a ni,” a ti.