£30million zetin Tottenham record fee-in nikum hmasa nipui khan Roma atangin London club ah suan luh a ni a, hetih lai hian London club tan a che chhe hle, a man leh Italy-a a chet thin dan ngaihtuah chuan che ropui lo tak a ni.

Chutih laiin Pochettino chuan a hnampui Lamela hian Spurs tan ropui taka a la khelh theih ngei a rin thu a sawi. Gareth Bale an hralhna pawisa khan Spurs hian player 7 zet an lei a, chung zinga pali Roberto Soldado,Paulinho, Etienne Capoue leh Vlad Chiriches te Tottenham chuan tun nipui bazarah hian chhuah tir mai an rilruk.

Kum 23 mi Erik Lamela hi Atletico Madrid leh Inter Milan te chuan beisei hle mahse Tottenham-ah a cham zui dawn niin a lang. Spurs Sporting director Franco Baldini chuan tun nipui hian club a chhuahsan dawn a. Tunah chuan Pochettino chuan Spurs dinthar nan player lei leh hralhah thuneihna pumhlum a nei ti ila kan sawi sual lovang.

Tottenham hotute chuan tun nipui chhung hian team dinthar nan £30m an thehchhuak dawn a. Pochettino chuan Central defence, midfield leh striker Harry Kane pui tur player lak tumin transfer market-ah a mit a len tan mek. Tottenham hian an player tha thenkhat an chelh thei lo ve maithei bawk a. Danny Rose chu Machester City chuan lei an tum mek a, Spurs hian £15m vel an chhiar a, Tin, Spurs hian an keeper Lloris pawh an chan maithei bawk. Manchester United leh PSG in an hel mek, Heng club pahnihte hian £25m pawhin an ngam tlat mai le.