​Pochettino-a’n a player-te a chhuang

18th April 2019, 04:04PM

Tottenham chuan Champions League Quarter-final ah Manchester City paltlangin semi-final an lut a, Tottenham manager Mauricio Pochettino chuan a player-te a chhuan hle thu a sawi.

First-leg-ah Tottenham hi an mualah si khat faiin an chak a, second leg inkhel hmuhnawm takah City hi an mualah 4-3 in an chak ve bawk. Aggregate-ah 4-4 a ni a, City in away goal an neih loh laiin Tottenham chuan pathum lai an neih avangin Spurs hi away goal rule hmangin an tlang.

Second leg inkhel a hmuhnawm rem rem hle a, a tir minute 21 chhungin goal nga a luta, hei hi Champions Leaugue chanchinah a tir minute 21 chhunga goal nga a luh vawi khatna a ni nghe nghe.

He inkhelah hian engkim a thleng a ni ber a, Tottenham goal thumna luh danah hian goal khungtu Fernando Llorente chu a hand-ball niin a langa, VAR hmanga uluk taka endik a nih hnuah goal-a pawm a ni. City hian hun tawp hma lawkin goal an khunga, Raheem Sterling chuan City chakna goal a khung emaw a ti na a, Sterling ball petu Sergio Aguero chu a offside avangin VAR chuan goal hi a sut leh bawk.

Pochettino chuan, “Sterling-a goal sut leh a ni kha keichuan ka en ve lem lo, VAR-ah hian rinna kan nghah a ngai a ni. VAR hman a nih chuan eng emaw chenah football a thlak danglam dawn tih ka lo sawi tawh thin a, kan duhdan a ni emaw kan duh lo dan pawh nise VAR thutlukna hi kan pawm a ngai.

“Tuna pawimawh ber chu semi-final kan lut hi a ni a, semi-final luh hi ka phu pawhin ka hria. Ka player-te hi ka chhuang em em a, inkhel hma khan kan chak emaw kan chak lo emaw ka chhuan em em thu ka lo sawi tawh bawk. Tunah chuan semi-final kan luta, ka player-te hi ka chhuang tih mai piahlam a ni,” a ti.

Copyright © inkhel.com 2024. All rights reserved.