26 Sep 2020 12:47

inkhel

PMIV 2020 lawmman sem a ni

August ni 16-a khelh zawh tak, PUBG Mobile Inter Veng (PMIV) 2020 chu hripui leng avanga hun rei tak lawmman sem thei loa awm hnuah September ni 26 chawhnu dar 1:00 khan Dawrpui Vengthar YMA Indoor Stadium-ah sawm bikte nen lawmman semna hun hman a ni.

Prize distribution programme hi Dawrpui Vengthar eSports Chairman Dr. Lalrinawma Hnamte chuan kaihruaiin thuchah tawi sawina hun a hmang a, chumi hnuah lawmman sem chhunzawm nghal a ni.

Dr. Lalrinawma Hnamte chuan, “Tunlaiin thalai zingah mobile games khel an thahnem hle a, hetianga games khel thin zingah hian PUBG Mobile hi sawisel hlawh pawl tak niin a hriat a. Eng vanga miin sawisel thin nge an nih tih hi ngaihtuah chiang ila, games khelh dan chin tawk neih thiam a pawimawh tih hre thar ang u,” a ti.

“Mobile games kan khelh avangin in chhunga kan tih tur thulh phah miah loh tur a ni a, kan hun awlah games chu kan khel ang a, tih tur kan neih dangte chu dah pawimawh hmasak phawt zel tur a ni a. Hna dang thulhna atana kan hmang a nih chuan a fel lo hle ang,” a ti bawk.

Lawmman sem dan chu hetiang hi a ni.
Champion : Rangvamual - Trophy, T-shirt, Memento & Rs. 70,000 (singsarih)
Pahnihna : Dawrpui Vengthar - Trophy, Memento & Rs. 30,000 (singthum)
Pathumna : Electric Veng - Trophy, Memento & Rs. 10,000 (singkhat)
Most kills : Lalrawngbawla (CK Melv), Electric - Trophy & Rs. 5,000 (sangnga)
Finalist : Memento

Heng bakah hian Tobi (host) leh Booboo (commentator)-te hnenah Memento leh pawisa an pek bakah tournament chhunga mi tangkai tak takte hnenah pawisa hlan an ni bawk.