Australian Open khelh mekah world number 1 hnehtu Serena Williams kal tluang mek chu Karolina Pliskova chuan a titawp a, quarter final-ah Pliskova hian Serena hi 6-4, 4-6, 7-5 a hnehin semi final a lut a ni.

Nilaini khan Serena Williams chuan Grand Slam title 24 lak a tumna kawngah quarter final-ah Karolina Pliskova hi a hmachhawn a. Rod Laver Arena-a inkhelah Czech star chu han che fuh lo chho deuh hman mahse a hnuah a insiam tha a, American star chu a lehthal leh thei ta a ni.

Karolina Pliskova hian semi final-ah Naomi Osaka a hmachhawn dawn a, anni hian final lut thei zawk nih an inchuh dawn a. US Open ah pawh anni hi an lo inkhel tawh a, chumi tum chuan Pliskova hian Japanese nula hi a hneh lo a, tun tumah hian 7th seed zawk Pliskova hian 4th seed Osaka chu hneh a final luh a tum dawn a ni.

Serena nen an inkhelh zawhah Karolina chuan, “Set hnihnaah khan a rawn khel tha chho khawp mai a, ka khelh dan a buai ve thung a. Ka rilru pawh kha a buai chho hman angreng a, mahse a hnuah ka inngaihtuah harh a, a tawpah a chak zawk ka ni leh thei hlauh a ni,” a ti.

“Ka chak thei hi ka lawm khawp mai a. Osaka hi hmachhawn khirh deuh ni tho mahse Serena aia hlauhawm hi an awm loin ka hria a. Hei vang tak hian Serena ka hneh thei hi ka lawm hle ringawt mai a ni,” a ti bawk.

World number 1 lo ni tawh thin Serena Williams chu tun tumah hian 16th seed a ni a, September 2017 a fa a neih hnuah tennis a khel chho leh tawh a ni.