15 Apr 2018 09:51

digimalt

​Player tha tehna enge?

Lionel Messi leh Cristiano Ronaldo te chu tunlai football player zingah chuan top an ni tih kan pawm vek. Player tha tak an ni tih kan sawi theihna chhan chu match an khelhin an chetthat thin vang a ni. Tun tumah erawh an pahnih kar kan teh dawn lo.

Football khel tur chuan training tha taka neih a ngai. Training neihnaa an zirte chu match khelh hunah an lantir ta thin a. Training kalkim thap thap mahse match an khelh tuma an thil zir ang kha an hmanchhuah theih si loh chuan footballer tha an ni thei ngai dawn lo a ni.

Practice kal that leh match khelh tuma chetthat a pawimawh zia chu a inang reng maithei, hetih lai hian player tha tehna chu training neihnaa a chetthat lam ai mahin, match an khelh tuma a chetthat dan atangin a ni ziah a. Match khelha chetthat a pawimawh em em kan tih rual hian chuta chetha thei tur erawh chuan training neih that erawh a ngai chiang mai.

Biak In hi training kan neihna hmun a ni a, match kan khelhna hmun erawh kan nitin eizawnna, lehkha zirna leh kan thenawm khawvengte nena kan karthuah te a ni tlat mai. Mizote hi kan inkhawm nasa em em a, hetih lai hian match tak tak khelh hunah hian kan Kristianna hi kan tilang thin em? Tih hi inzawh tham a ni tlat mai.

Inkhawm that hi ringtu tha leh tha lo tehnan kan hmang nasa tih chu phat rual a ni lo. Mi a lo inkhawm tam lem lova, rinna kawngah a hla ta hle niin kan ngai thin. Chutih laiin amahin in lamah emaw Bible te chhiarin tawngtaina hun a lo hmang hnem fu thei a, kan tehsual ve thei tlat mai.

Hetih lai hian football-ah chuan kan hre theuh anga, team training zawm lova mahnia training neih hi chu hmasawn erawh a har em em thin. Chuvang chuan team training zawm hi footballer chawl tawhte pawhin an tih thin a ni a, heta lang chiang tak chu a huhova training neih hian hmasawnna a chak zawk a, inkhawm hi a huhova training kan neihna pawimawh tak a ni.

Football Training neih that hi player tha leh tha lo tehna a ni thei lova, chutiang chiahin inkhawm tam hi ringtu tha leh tha lo tehna atan a hman tlak loh. Match khelh tuma chetthat hi player tha leh tha lo tehna a nih angin kan nitin nuna Kristian kan nih zia tihlan hi ringtu tha leh tha lo tehna a ni zawk thin. Hetih lai hian kan sawi tawh angin, ringtu tha tak nih dawn chuan training neih that erawh a ngai tih chu sawi nawn leh teh ang.

A chunga kan sawite aia pawimawh zawk a la awm cheu mai. Player tha tak ni mahse a khelhna club kha hlawh lak nan chiaha ngai an awm ve teuh mai. Malsawmna dawn nan chiah nia ngaih theih tura Pathian ngaihsak anna nei ringtu an awm ve teuh a nia. I khelhna club i hmangaih chuan training pawh i kal tha anga, match khelh hunah pawh i theihna zawng zawngin i khel thin ang. Pathian hmangaihna tak tak i neih chuan Amah biak honaa tel nuam i ti anga, i nitin nunah Kristian i nihzia i lantir bawk ang.

A tawpah chuan hmangaihnaah kan lut leh nge nge thin, a lo pawimawh tak zet ani e. Isua khan van a lawn dawnah khan thupek thar ringtute hnenah a pe, "Lo inhmangaih tawn rawh u," a ti a nih kha. Kan mihringpui kan hmangaih chuan an chanai kan eiruk sak ngai lovang, keini aiin dinhmun thaah ding se tiin kan duhsak zawk anga, kan thenawmte kan ruksak ngai lovang a, kan tina ngai hek lovang. Hmangaihna hi dan zawh famkimna a lo ni si a.

Eng ang pawhin inkhawm taima mah la i chenpui i unau ngei i hmangaih si loh chuan engtihna mah a ni lo, thlarau thilpek ropui tak tak dawng mah la i thenawmte ram i nek tlat si chuan engtihna mah a ni lo. Kohhranah nihna sang tak tak chelh mahla i duham tlat si chuan Bible-in milem betu a ti tho tho che.

"Mihring ṭawngte leh vântirhkoh ṭawngtein thu sawi thei mah ila, hmangaihna ka neih si loh chuan, dâr ri ang emaw, dârbenthek ri ang emaw chauh ka ni ang. Thu hril theihna neiin, thu ril zawng zawng leh hriat tûr zawng zawng hre vek mah ila, tlâng sawn theihna khawpa rinna nasa nei mah ila, hmangaihna ka neih si loh chuan eng mah ka ni lo vang. Ka neih zawng zawng mi retheite tân pe vek mah ila, hâl tûrin ka taksa pawh inpe mah ila, hmangaihna ka neih si loh chuan ka tân eng mah a ni lo vang." (1 Korinth 13:1-3)