Manchester United goalkeeper hlui Peter Schmeichel chuan kumin nipui lai khan player-ten United an zawm duh loh thu leh chu chu United chanchin kum 25 chhunga thil lungchhiatthlak ber a nih thu a sawi bawk.

United chuan tun nipui bazar lai khan Fred, Diogo Dalot leh Lee Grant-te bak lakluh an nei lova, defender zawng nasa hle in, player hrang hrang dawr mahse United zawm duh lo an awm nuk niin media-te chuan an sawi nasa hle.

United hian Tottenham defender Toby Alderweireld, Bayern Munich defender Jerome Boateng leh Atletico Madrid defender Diego Godin bakah Liecester City centre back Harry Maguire-te chu an dawr veka, Boateng leh Godin-te hian United hi zawm an duh lo niin media-ten an sawi lar zual.

Peter Schmeichel chuan, “Bazar hun hnuhnung ber kha United chanchin kum 25 chhunga lungchhiatthlak ber a ni. Player-te khan United an hnar a, United tana khelh an duh lo.

“Jose Mourinho-a tan pawh thil awlsam a ni bik lova, bazar chungchangah thu a nei tamin ka ring lo. Air Alex-a chhuah hnu khan thil chu a khirh dawn tih ka hre sa a, mahse David Moyes khan kha aia hun tam kha nei se ka la ti fan a ni,” a ti.

Mourinho hian kum 2016 khan United hi a zawma, bazar nan pound maktaduai 393 lai hmang tawh mahse tun season-ah United chu eng an ang thei lova, pariatnaah an awm mek a ni.