Footballer insuihkhawm pawl FIFPro chuan thlasik laia World Cup neih an duh tawh lo tih an sawi.

FIFPro hian Sahmulphah thla leh Pawltlak thla inkara neih 2022 World Cup an thlir kir a, player-te'n an hah phah hle tih an tarlang. European club-te chuan World Cup hnu khan ni 37 chhung chawlh an tum zet a, season kal lai a buai theih avangin ni riatah an pawt tawi.

FIFPro general secretary Jonas Baer-Hoffmann chuan thlasik laia World Cup awm hi player zawng zawng tan a tha lo tih a sawi a, FIFA president Gianni Infantino chuan khaw vawh laia intihsiakna awm hi nipui laiin a nung tih a sawi thung. Qatar thlen World Cup hnuhnung ber kha thlasika an nghah tawpna ber ani lo maithei a, hun lo la awm leh turah pawh kan la hmu fo dawn niin a lang.

Saudi Arabia-in 2034-ah an thleng dawn tih a chiang tluk a ni a, anni pawh hian an ram vawh lai ber an thlan a rinawm. World Cup atan hian a tlangpuiin inpuahchahna hun thla khat vel an nei thin a, nikumah kha chuan season laklawh lai anih avangin kar khat vel chiah an nei.

Season kal tluang lai hi tih tawp theih nise mahse, player-te ngaihtuah tel an ngai a, World Cup hnu lawka intihsiakna dang khelh lehnghal hi FIFPro chuan an duh lo. League hrang hrangte titipui hmasa tawh turin FIFA an ngen a, thla hnih leh a chanve tal chawlh a tul dawn avangin an inrem thei erawh an beisei lo.

Poland defender Kamil Glik chuan World Cup an mangtha atanga ni li hnuah Benevento tan a khel nghal a, Raphael Varane pawhin final-a an chakloh hnu ni riatnaah Manchester United tan inkhel bul a tan. France centre-back hian 2023 Ramtuk thla tir lamah ram tana inkhelh a chawlhsan a, chawlhna hun an neihloh avangin a zo lo tih a sawi.

Player-te hian inpuahchah nan a tlem berah ni 14 vel an duh tlangpui a, ngaiawh leh turin ni 14 atanga ni 28 vel an mamawh. Morocco, Spain, Portugal, Argentina, Uruguay leh Paraguay-te inthlen tawm tur 2026 World Cup-ah pheichuan team 48 an tel dawn a, a hma zawng aiin inkhel a tam dawn a ni.