Tottenham manager hlui Harry Redknapp chuan Argentine manager Mauricio Pochettino chuan player-te avangin a hna a chan niin a sawi.

Pochettino hi manager chhia a nih loh zia kan hre veka, kum 2014-a Tottenham a enkawl hnuah Tottenham hian nasa takin hma an sawna, sum sen tur nei tam lo viau thin mahse Tottenham hian hniam lam aiin san lam an pan a tih loh theih loh.

Tottenham hian season liamta khan Pochettino-a hnuaiah Champions League final an luta, hei hi an club chanchina an vawi khat Champions League final luhna ni nghe nghe mahse league lamah erawh season liamta tawp lam atang khan an che tha tawk lova, tun season-ah pawh beisei pha lo zelin Pochettino chuan a hna a chan zui ta bawk.

Pochettino tih lova Tottenham manager hlawhtling bera chhal ngam Harry Redknapp chuan Pochettino ban chhanah player-te a puha, Redknapp chuan, “Player-te Pochettino hi an hmangaih thu mi hian an sawi fo thina, mahse an hmangaih tak tak a nih chuan an khel tha tur a ni.

“A tawpah chuan player-te hian Pochettino an ban a ni bera, an khel tha tawk lova, manager in a tuar ta a, an hmangaih tak tak a nih chuan a tan tha takin an khel tur a ni,” a ti.

Tottenham hian Chelsea a enkawl laia vawi thum lai Premier League title lo la tawh Mourinho chu an ruai dawn niin a lang meka, Harry Redknapp-a fapa Jamie Redknapp chuan Mourinho chu manager tha tak ni mahse Tottenham-ah a che tha ve kher dawn em tih sawi harsa a ti deuh.

Jamie chuan, “Tottenham hian manager thar an rawih thuai ka ringa, Jose hi mi tam zawkin Spurs manager thar tura an rin a ni mek.Tunah manager hna a nei lova, football khawvelah ani aia sulhnu nei tha an awm bik chuang lo.

“Tottenham-ah a insiam remin a che tha ve kher ang em tih erawh a hriat lova, Jose hi chuan sum hman a duh dawn a, Tottenham chairman Daniel Levy erawhin sum hman a duh ve lo. Jose hian Tottenham-ah player tha tak tak lakluh a duh dawn.

“Jose hian player naupang an chhawr tam lem lova, player tawnhriat ngaha innghah a ching zawka, mahse a hlawhtlinpui tawh miau avangin a kalhmang hi sawisel sak ngawt theih a ni lova, tunah hian ani aia tha hi Tottenham tan an awm rih chuang lo a ni,” a ti ve bawk.