Player of the Month ni thei tur Pukki, Sterling, Aguero

07th September 2019, 03:09AM

Norwich City striker Teemu Pukki chu August thla chhunga Premier League Player of the Month ni thei tur zingah telin, Raheem Sterling leh Sergio Aguero te nen beiseiawm pawl an ni.

Thla tin chawimawina an sem thin dawng thei tur zingah hian Premier League title kawltu Manchester City chuan player pathum ngawt an thawh a. Sterling leh Aguero te bakah Kevin De Bruyne te chu an tel a ni.

Pep Guardiola pawlte chu tun season chhunga vawi li an khelh tawhah vawi thum chu an chak tawh a. An game hmasa berah England winger Sterling chuan West Ham United lakah hattrick a siam a. Tottenham nen 2-2 a an inhnehtawk tumin goal a thun a, 3-1 a Bournemouth an hneh tumin a thun leh bawk a. Tun season chhungin goal 5 chu a thun tling der tawh a ni.

Teemu Pukki chu Premier League team thar Norwich tan a che tha nghal viau mai a, tun season-a game li an khelh tawhah Canaries tan goal 5 a thun tling tawh a ni.

Sergio Aguero chu tunah hian Premier League-a goal thun hnem ber a ni mek a, game 4 khelhah goal 6 a thun tling der tawh a. 4-0 ngawta Brighton & Hove Albion an hneh tumin Argentina striker hian goal hnih a thun a ni.

2018-19 season chhunga inhliam vanga inlan tam thei ta lo Kevin De Bruyne chuan tun season-ah a thiamzia a pho chhuak nghal vat a, goal khat a thun tawh bakah mi goal thun tur vawi 5 ngawt a siamsak tawh a ni.

August thla chhunga player che tha chawimawina dawng thei tur an thlan chhuah mi paruk zingah Liverpool striker Roberto Firmino pawh telin, Burnley forward Ashley Barnes pawh an thlang tel bawk a. Ashley Barnes hian game thum khelhah goal 4 a thun thei a ni.

Manager of the Month dawng thei tur pawh an chhawp hrang tawh a, tuna Premier League-a pahnihna ni mek Pep Guardiola chu thlan chhuah zingah hian a tel a. Premier League hmahruaitu ni mek, vawi li khelha la chak kim vek, Liverpool boss Jurgen Klopp bakah Leicester City boss Brendan Rodgers te chu chhawp chhuah zingah hian an tel.

Palinaa Crystal Palace awmtir theitu Roy Hodgson chu chhawp hran zingah hian telin, Old Trafford-ah Manchester chu 2-1 in an hneh thei ngat a ni.

2018-19 season chhung khan Sergio Aguero, Raheem Sterling, Lucas Moura, Eden Hazard, Pierre-Emerick Aubameyang, Virgil van Dijk, Marcus Rashford, Sadio Mane leh Jamie Vardy te chuan Player of the Month chawimawina an dawng hlawm a. Thla tin chawimawina hi vawi khat aia tam dawng thei an awm lo a ni.

Copyright © inkhel.com 2024. All rights reserved.