Unai Emery chuan player naupang zawkte chu khelhna hun tam thei ang ber pek a tum thu a sawi chhuak.

Arsenal chuan pre-season tour an nei mek a, International Champions Cup khelin Bayern Munich chu 2-1 in an hneh a. He inkhelah hian tlema player naupang zawkte chu a luhtir deuh nual a, an khelh zawhah season tan hunah pawh player che tha zualte chu khelhna hun tha tam zawk siamsak a tum thu a sawi.

England Under-21 player Eddie Nketiah chuan California khawpuia inkhelah minute 88-ah goal thunin German champion lakah Arsenal chu 2-1 in a chakpui a. Kum 20-a upa Nketiah hi a hmaa 3-0 a Colorado Rapids laka an chak pawhin a che tha hle a. A hmain Premier League match 8 ah a lo inlan ve tawh a, substitute bench atang vekin a lut a. Season tan hunah chuan a hma zawng aia a khelh tam theih tawh a beiseiawm hle.

Tlema player naupang deuh hlek, Ainsley Maitland-Niles, Joe Willock leh Bundesliga club Hoffenheim-a loan-a kal zo chiah Reiss Nelson te chu Arsenal tana khel tam ve tan thei tura ngaih zinga mi an ni.

Emery chuan, “Kan player zingah tlema la naupang deuh zawk tha tak tak an awm teuh a. Hetiang player naupang zawkte khelhna hun tam zawk pek hi kan mawhphurhna a ni a. Player naupang zawk khelh kualtir a, an puihna kan mamawh chang hi a tam a ni,” a ti.

“Player thenkhat chu pre-season laiin kan hnenah an awm a, a then chu season tan hunah pawh an awm zel dawn a. Player phanchang deuh tawhte laka an chet dan chu kan thlithlai reng dawn a, a tlangpuiin an che tha thei hlawm viau a ni,” a ti bawk.

A sawi zelnaah, “Bayern Munich nen kan inkhelh khan kan player te kha an che chhe lo viau mai a. Colorado Rapids kan hmachhawn tum phei kha chuan player naupang zawkte kha kan khelhtir hnem daih zawk a, chuti chung chuan khelmualah an zahpuiawm lo hle a. Nakin zelah pawh khelhna hun tam zawk chantir zel kan tum a ni,” a ti.

Arsenal chuan player thar pakhat chiah an la rih a, Gabriel Martinelli tih loh chu lak thar an la nei lo a. Tun hnaiah Under-23 head coach Freddie Ljungberg chu first-team assistant atan ruat thar a ni a, hei vang hian a hmaa a lo kaihhruai tawh thin player naupang zawkte chu first team lamah pawh an seng chhoh nual a rinawm a. Ljungberg hian heng player naupang zawkte hi a hre chiang hlawm viau tura ngaih a ni.