Manchester City chu football khawvelah player leina atan €1 billion chuang hmang hmasa ber an ni niin CIES Football Observatory chuan an sawi.

Tun hnaia CIES Football Observatory-in an zir chiannaah Premier League champion te chu tuna an squad rem khawmna atan €1.014 billion ($1.10 billion) zet an hmang niin an sawi a, Ligue 1 champion Paris Saint-Germain chuan an squad fawm khawmna atan (€913 million/$1 billion) zet an hmang tling bawk a. Real Madrid chuan (€912 million/$995 million) an hmang bawk a ni.

Season liam taah khan Manchester City chuan title pathum an la a, kuminah an club transfer record thar siamin Spanish midfielder Rodri chu Atletico Madrid atangin £62.8 million ($77.6 million) in an lei a. 2010 kuma an lak luh David Silva pawh an squad-ah hian a tel bawk.

Premier League champion Manchester City hian player leina atan Norwich City pawisa hman let 32 vel zet chu an hmang a. Hetianga CIES Football Obervatory thil zir chian hi 2010 hnu lama thil thleng chin a ni.

Manchester United chu palina niin €751 million ($829 million) an hmang tling a, an hnuaiah hian €719 ($793 million) hmangtu Juventus leh €697 ($769 million) hmangtu Barcelona te an awm bawk a. European champion Liverpool chu pasarihnaah an awm a, an sum hman zat hi €639 ($705 million) niin an sawi.

City neitu Sheikh Mansour bin Zayed al-Nahyan company Abu Dhabi United Group chu kum 10 chhunga player leina atana sum hman kawngah an chungnung ber bawk a. Hemi hun chhung hian City chuan player leina atan €1.368 billion ($1.809 billion) zet chu an hmang hman a, Barcelona chu an hnuai chiahah awmin, an sum hman zat chu €1.525 billion ($1.685 billion) a ni.

Chelsea, Paris Saint-Germain, Juventus, Manchester United, Real Madrid, Atletico Madrid leh Liverpool te pawhin kum 10 chhungin player leina atan €1 billion ($1.1 billion) chu an hmang tling hlawm niin an sawi.

French club Monaco chu 2010-2019 inkara player man dawng hnem ber an ni a, hemi hun chhung hian Monaco chuan player hralhna atangin €1.029 billion ($1.135 billion) an la lut a. Paris Saint-Germain hnena €180 million ($199 million) zeta Kylian Mbappe an hralhna pawh hetah hian a tel a ni.