Liverpool chuan transfer window inhawn chhung hian chet lak an tum tawh lem lo niin Jurgen Klopp chuan a sawi.

PSV Eindhoven atanga Cody Gakpo la chhuak tur khan chet an thawh hmanhmawh ang reng a, Window inhawn hma atangin khan nasa takin a rukin hma an lo tawh a nih kha.

Virgil van Dijk chuan hliam a neih avangin a thla a thla chawlh a mamawh dawn a, Liverpool hian inhliam an neih neuh neuh vangin harsatna an tawk mek. Fan thenkhat phei chuan Premier League top 4-a an lan theih nana puitu tur lei nan  sum thehchhuak turin Liverpool hi an nawr hial.

Mahse Klopp chuan mi thara rilru pek a duh tawh rih lo a, a neihsate tha taka enkawl chu a mawhphurhna lian ber a nih thu a sawi.

"Liverpool-ah hian pawisa chungchangah vawi 6,000 conference ka nei tawh. Pawisa tam tak nei chunga player lak luh tur hre lo kan ni lo. A chhan ber chu player thar kan mamawh belh loh vang a ni zawk.

"Transfer hi kan buaipui dawn lo. Ka hna ber chu ka kawl laite enkawl that hi a ni. Eng club-ah pawh inhliam hi kan buaina ber a ni a, transfer tih vel hian engkim a ching fel chuang lo,"tiin Jurgen Klopp chuan a sawi a.

Klopp chuan tun dinhmunah an chak tawk loh thu sawiin, kum rei lote kal taa Premier League leh Champions League champion thei Liverpool leh tuna Liverpool hi tehkhin lo turin fan-te a ngen.

"Tunah rih hi chuan arsi eng ber kan ni lo, mahse kan paltlang thuai ang. Hun tha kan la nghah a, kan thatlai nena intehkhin kan duh lo. 

"Hun danglam ang zelin thil pawh a danglam thin a, theihtawp kan chhuah ve mek bawk,"tiin Klopp chuan a sawi a ni.