Australia tana goal khung hnem ber Tim Cahill chuan Everton-a a lo khelhpui thin, tuna Arsenal manager ni mek Mikel Arteta chu player a nih lai pawhin coach an mai a nih thin sa thu a sawi.
Kum 2004-05 season khan David Moyes chuan Cahill leh Arteta-te hi thlasik bazar laiin Everton-ah a lalut ruala, Arteta erawh hian a tirah loan-in Everton hi a zawm phawta, Arteta leh Cahill-te hi Everton tan kum ruk leh a chanve an khel dun.
Cahill leh Arteta te hi hun rei tak chhung Everton-ah an khel duna, Everton player pawimawh ber zinga mi ni dun chho ngar ngarin, kum 2011 khan Arteta hian Goodison Park chhuahsanin Arsenal a zawma, Cahill hian a kum lehah Everton chhuahsan ve lehin, ani hian MLS club New York Red Bulls a zawm ve thung.
Cahill hian season khat Indian Super League-ah a khel zuaia, kum 2018-19 season khan Jamshedpur FC-ah a hun tawp a hmanga, nikum khan inkhel a chawlhsan. Arteta hian Arsenal-ah a hun tawp hmangin, kum 2016 khan inkhel a chawlhsan ve thung.
Inkhel a chawlhsan hnuah Arteta hi Manchester City-ah Pep Guardiola-a thlazar hnuaiah assistant manager a ni a, nikum khan Arsenal a enkawl tan.
Cahill chuan a thianpa Arteta chungchang sawiin, “A club khelh tawhna te en chuan, Paris Saint-Germain, Barcelona, Rangers, Everton leh Arsenal-ah te coach tha tak tak a hrawn tawha, chu bakah player tha tak tak bulah a tal hnem hle.
“Mikel hi player a nih lai pawh khan coach a ni sa renga, information a dawn ang ang kha a mahah a seng luta, a ngaithla tha a, tih dan kawng hrang hrang a a zawng reng thina, player te pawh a titipui peih em em thin.
“Leader tha a ni a, kan inkawmngeih em em bawka, khelmual chhungah kan inman hle. Training-na leh a pawn lamah pawh kan titi dun fo a, kan hmachhawn tur team te kan zir chiang duna, keimahni lam pawh inenlet thin.
“Manchester City-a hun a hmang kha a tan a tha hle in ka hria a, Arsenal a zawm hi a ngai bawk. A maha club a enkawl ve a ngai a, Arsenal pawh club ropui an ni. Ka club hmangaih Everton nen sawizawm ni mahse a zawm ta lo kha pawi pawh ka lo ti viaua, mahse Arsenal-ah hian a hna a thawk tha hle.
“Club-in kalhmang an lo neih sa leh an khelh dan awm sa te thlak danglam thei tur khawpin Mikel hi a tha a, player-te khelh dan atang pawhin chu chu kan hmu vek tawh a ni. Hun chu a mamawh dawna, City-a a awm ang ngawt chu a ni dawn lo, mahse a la hlawhtling ngei dawn a ni,” a ti.