Liverpool manager Jurgen Klopp chuan inkhel thei player 11 an neih chhung chu an bei zel dawn tih a sawi.

The Reds hian Nilaini zan khan Premier League-ah 4-1 in Luton Town an hneh a, hliam vanga chhawr theihloh senior player pakua lai an nei. Anfield-a inkhelah hian Alisson, Trent Alexander-Arnold, Diogo Jota, Mohamed Salah, Thiago Alcantara, Dominik Szoboszlai, Joel Matip, Curtis Jones leh Darwin Nunez-te an inlan lova, Pathianni zan hian Carabao Cup final-ah Chelsea an tum ang.

Klopp chuan, "Final-ah tute nge tel thei dawn ka hre lova, mahse Luton kan hmachhawn hmaa ka sawi angin, player 11 an awm chhung chu theihtawp kan chhuah ang. Champion tura rinkai zawk kan ni angem? Teuh lo mai a teuh lo lutuk. Kan in tum hnuhnun ber atanga chhutin, Chelsea hian hma an sawn nasa em em a, inkhel hautak tak a ni dawn tih kan hria." tiin a sawi.

Luton an hnehna inkhelah hian goal an chhuah hmasa a, goal lia chhangletin a tawpah an dingchang. An hnuai chiaha awm Manchester City nena an inkarah point li a tlazep ta a, game khata khel tam chungin pakhatna dinhmun zui zel. Luton hian minute 12-naa Chiedozie Ogbene tauh luh hmangin hma an hruai a, sut tumin theihtawp chhuah mahse first half-ah an hlawhtling lo.

Luis Diaz-in a huntha neih uiawm takin a thelh a, chawlhlawk hnuah erawh an danglam ta hle. Second half an tan atanga rei loteah Virgil van Dijk-in an si phur a sut a, Alexis Mac Allister corner pet atanga ball chhuak chang fuhin a tauh lut chiang hle. Minute hnih hnuah Cody Gakpo-in ati goal veleh a, Mac Allister thawhrah tho niin hma an hruai ta zawk.

Shot vawi kua lai a neih hnuah Diaz a hlawhtling a, minute 71-naah Andy Robertson siamsak khungin an dinhmun a sawh nghet. Colombian forward hian box pawn atanga lalutin defender pakhat a bum a, a hnua petin Luton goalkeeper Thomas Kaminski a che hman lo. Hun pekbelh a kal tep tihah Harvey Elliott-in an goal lina a khung a, Liverpool tana game za (100)-naah chiang zetin a pet lut.

Inkhel pumpuiah mualneitu lamin 61% ball an chang a, shot vawi 29 zet neiin goal zawnah vawi 13 an pet bawk. Luton-in huntha tia sawi theih an nei tam lova, goal zawnah vawi thum chiah petin shot vawi 12 an nei. Chiang takin chak lo tho mahse, Kaminski zarah goal li lek an chhuah a, kum 31 mi hian tha tak taka dan a nei hnem hle. Liverpool manager Jurgen Klopp tan duhthlan tur an tam lova, a neih ang ang chhawrin hnehna an chang.

An bench-a thu zingah kum 19 leh a hnuai lam panga an awm, hetah hian kum 16 mi Trey Nyoni pawh a tel. Inkhel bultantute kum chawhrual pawh kum 25 leh ni 68 a ni a, 2018 Ramtuk thla hnuah starting XI an neih naupan ber a ni. Goal an chhuah hma avangin an talbuai lek lek a, inkhel thununtu zawk ni chungin an si phur an sut lawk thei lo. An chawlh laia Klopp thusawiin awmzia a nei a, league-a mikhual an neihna hnuhnung game 25-ah vawi khat mah an tlawm lo.

Pathianni zana Carabao Cup final an khelh hunah Salah leh Nunez an tel thei maithei a, Alexander-Arnold, Szoboszlai, Jota leh Thiago-te erawh beisei ngam an nilo. Nunez hian Inrinni zana Brentford an hneh tum khan hliam a nei a, half time-ah thlak niin Salah a inlan thung. Aigupta captain hian ram tana a fehchhuahnaah kaiza hliam a nei a, kartawp inkhelah tel zuk mahse Luton a hmachhawn lo.

First team-a awm an inhliam nasat avangin player naupang an chhawr a, an duh ber point thum hlawhchhuakin table-a an dinhmun a tha sawt bawk. Huntawp dawn hnaihah Crystal Palace midfielder hlui Neil Emblen fapa Jayden Danns a lut a, kum 18 mi hian senior team tana a game hmasa khelin an goal lina a thawkchhuak. Kum 20 mi Elliott tan pawh zan chhinchhiahtlak tak a ni a, naupang tak ni chung siin The Reds tan vawi za a khel tling ta der mai.

Sawi chhunzawmin Klopp chuan, "Hmalam hun ka thlirin lung a awi hliah hliah a, Liverpool hian innghahna tur tha tak tak kan nei. Khel thei lo an tam avangin kum lama naupang zawk kan chhawr lo thei thei lova, hnehna min chanpui avangin ka hlim takzet. Mamawh hunah tak Jarell Quansah alo lang a, Conor Bradley, Bobby Clark leh James McConnell-te pawh an fakawm ngei mai. Hma an sawn tih ka hmuin ka hlim a, an inpekna avanga chak kan ni." tiin a sawi.

An goal lina khungtu Elliott hian shot vawi nga lai a nei hman a, chance vawi sarih siamin an tumpuite box chhungah ball vawi 17 a khawih bawk. Luton box leh a chehvelah pass vawi 27 a nei a, Premier League season kal mekah goal li a thawkchhuak tawh. Liverpool hian kum 16 mi anihin an lalut a, England senior team-ah a luh chhoh thuai a rinawm. Season kal meka an chetthat theihna tur hian pet goal thei an ngah a, Salah, Jota, Nunez, Gakpo leh Diaz-te'n goal sawm an khung tling vek tawh a ni.