17 Nov 2020 06:11

inkhel

Phoenix Suns-ah Chris Paul a lut

Vawi 10 lai All-Star lo ni tawh Chris Paul chuan Oklahoma City Thunder chhuahsanin Phoenix Suns a zawm dawn.

Chris Paul hian Phoenix Suns a zawm ang a, Suns chhuahsanin player pali leh draft pick te chuan Oklahoma City Thunder hi an zawm ve thung dawn a. Paul leh a teammate Abdel Nader te chuan Suns an zawm ang a, Kelly Oubre, Ricky Rubio, Ty Jerome leh Jalen Lecque te chuan Thunder hi an zawm thung ang.

Oklahoma City Thunder chuan 2022 first-round draft pick an dawng dawn a, hetianga hma an lak avang hian Suns chuan season tharah playoff khelh theih ngei tuma tan lak an tum niin a ngaih theih.

Suns general manager James Jones chuan, “Chris Paul hi mi dang kaihhruai kawngah a tha em em a, hruaitu nihna a neih leh inkhelha chak ngei tumna rilru a put thin hi kan team tan chuan thil tha tak a ni dawn a, tangkai taka kan hman ngei kan beisei,” a ti.

Kum 35 mi Chris Paul hian Oklahoma City chu 2019 ah khan a zawm a, kum hnih chhung atan contract chu a la nei a. A hmain kum ruk chhung chu Los Angeles Clippers lamah hun a hmang a, he mi hnuah hian season hnih chu Houston Rockets tan a khel leh bawk a ni.

Phoenix Suns a zawm takah chuan Paul hi NBA huanga lar sawt tak, thiam berte zinga sawi mek Devin Booker nen an khel dun thei dawn a ni.

Season hman zawh takah khan Paul chu Thunder game 72 ah vawi 70 chu a inlan thei a, a average chu point 17.6 niin, 6.7 assist leh 5.0 rebound a nei bawk a, an team chu Western Conference lamah fifth seed a nihpui thei a ni.

Monty Williams, Phoenix coach chuan hun rei tawh tak chu Paul hi a lo ngaisang tawh a, kumin January thlaa Suns leh Thunder inkhelh dawn khan, “Paul hi mi danglam tak, pawl boruak pawh thlak danglam vek thei khawpa thiamna sang a ni a. A kalna apianga a bul hnaia awmte chu a hma aia tha zawkah a chhuah thei zel,” a lo ti tawh a ni.