Tun Premier League khelh zawh tak match hnuhnung ber Hull City leh Manchester United ten an khelh tum khan tharum thawhna a thleng tih hai chhuah a ni a, Hull player Able Hernandez chuan inkhelh laiin Man Utd defender Phil Jones chu a pumah a hnek.

Inkhelh lai khan referee Lee Probert chuan a hmu lo, inkhelh zawh match report-ah pawh a telh lo. Mahse FA chuan TV atangin kha thil kha an lo hmu chiang hle si a, ngun taka an en hnuah Hull striker Able Hernandez chu FA chuan Ningani khan a hremna a tichhuak ta a. Tharum thawh vangin Match thum Hernandez hi hrem a ni ta.

Ningani vek khan Hernandez chuan kha thil thleng chungchangah khan thiam thu sawi tur a neih loh thu leh FA hremna chu a pawm thu a sawi a, hetih lai hian Uruguay International hian season tharah Premier League a chhuahsan thut rin a ni a, anih loh pawhin KC Stadium hi chu a chhuahsan ngei rin a ni.