PFA Team of the Year an puang

25th April 2019, 10:04PM

PFA Premier League Team of the Year an puang chhuak a, hetah hian Paul Pogba pawh telin, Virgil van Dijk leh Raheem Sterling te nen a langsar pawl an ni.

2018-19 season chhungin World Cup winner Paul Pogba chu a che tha tluanchhuak lo hle a, mi tam tak chuan an sawisel nasa viau nghe nghe a. Heti chung hian goal 13 a thun bakah, mi goal thun tur vawi 9 a siamsak tawh avangin Team of the Year ah pawh hian an thlang tel ve a ni.

Goal vengtu turin Manchester City goalkeeper Ederson an thlang a, Ederson hi Brazilian Alisson aiin an thlang zawk a. Tlar hnunga ding turin Aymeric Laporte (Manchester City), Trent Alexander-Arnold (Liverpool), Virgil van Dijk (Liverpool) leh Andrew Robertson (Liverpool) te chu an thlang a ni.

Manchester City player Raheem Sterling, Fernandinho leh Bernardo Silva te nen Pogba hi midfield-ah an dah a. Tlar hmaah Manchester City striker Sergio Aguero leh Liverpool forward Sadio Mane te chu an dah bawk a ni.

Liverpool forward Mane hian tun season chhungin Premier League goal 18 chu a thun tling tawh a. Manchester City forward Sergio Aguero pawhin tun season chhungin Premier League goal 19 a thun tling tawh a, Golden Boot dawng thei dinhmunah a ding mek a. Anni pahnih hi Arsenal frontman Pierre-Emerick Aubameyang leh Liverpool striker Mohamed Salah te aiin an thlang zawk a ni.

Team of the Year-ah hian Manchester City player an lang hnem ber a, paruk ngawt mai an tel a. Liverpool player pali langin, Manchester United player pakhat a lang ve bawk a ni.

Kumina PFA Team of the Year-ah hian Chelsea star Eden Hazard chu tel lo langsar ber pawl a ni a, tun season chhungin goal 16 a thun bakah mi goal thun tur 13 a siamsak tawh a, Player of the Year chawimawina dawng thei tur zingah pawh a tel a, mahse Team of the Year-ah chuan a tel ta chuang lo a ni.

PFA Team of the Year:
Ederson (Manchester City); Trent Alexander-Arnold (Liverpool), Virgil van Dijk (Liverpool), Aymeric Laporte (Manchester City), Andrew Robertson (Liverpool); Paul Pogba (Manchester United), Fernandinho (Manchester City), Bernardo Silva (Manchester City); Raheem Sterling (Manchester City), Sergio Aguero (Manchester City), Sadio Mane (Liverpool).

Copyright © inkhel.com 2024. All rights reserved.