Professional Footballers’ Association chuan Player of the Year chawimawina dawng thei tur mi eng emaw zat an chhawp chhuak a, hetah hian Virgil Van Dijk leh Raheem Sterling te chu beiseiawm ber pawla ngaih an ni.

Liverpool leh Manchester City player te chu an langsar ber a, Virgil Van Dijk leh Raheem Sterling te bakah hian Sadio Mane, Sergio Aguero, Bernardo Silva leh Eden Hazard te chu he chawimawina dawng thei tura chhawp chhuah zingah hian an tel a ni.

2018-19 PFA Player of the Year chawimawina dawngtu hi April 28 hian PFA in hemi puala London khawpuia hun bik an buatsaihah an puang ang.

Virgil Van Dijk hian January 2018 khan Southampton atangin Liverpool hi a zawm a, tunah chuan Premier League khawvela defender tha ber pawla sawi a ni mek a. Liverpool chu clean sheet vawi 18 ngawt a neihpui tawh a, goal 20 chiah a la chhuah a, amah hian goal 3 a thun ve tawh nghe nghe a. Kumina chawimawina an sem tur pawh hi dawng tura ngaih a ni deuh ber a, mi tam ber chuan dawng ngei turah an ngai tawh a ni.

Senegal star Sadio Mane pawhin Jurgen Klopp hnuaiah season a hmang tha thawkhat hle a, Premier League goal 18 a thun tawh a, kum 29 chhung zet an lo nghahfak tawh Premier League title chu Anfield-a lak luh theih a tum hle.

Chawimawina dawng tura rin kai ber dawttu tia an sawi Raheem Sterling chu kum 27-a upa Van Dijk dawt chiaha an dah niin, Pep Guardiola kaihhruaina hnuaiah goal 17 a thun tawh a, mi goal thun tur vawi 9 ngawt chu a siamsak tawh bawk.

Kum 24-a upa ve ve Sterling leh Bernardo Silva te chu PFA Young Player of the Year chawimawina dawng thei tura chhawp chhuah zingah pawh an tel ve ve a. He chawimawina dawng thei tura an chhawp chhuah dangte chu Liverpool defender Trent Alexander-Arnold, West Ham midfielder Declan Rice, Bournemouth winger David Brooks leh Manchester United striker Marcus Rashford te an ni.