26 Mar 2020 12:42

bakteaJr.

Mizo tlangval

​PFA-in PL leh EFL emergency meeting a ko

Professional Footballers’ Association (PFA) chuan Premier League leh English Football League (EFL) te chu emergency meeting neih pui turin a ko va, season khailak avanga sum lama buaina chungchang an sawi ho dawn.

Tunah hian kan hriat theuh angin coronavirus darh nasat avangin season a khailak meka, hemi avang hian match-day a an sum lak luh tur ang ang club-te’n an la lut thei lova, league hrang hrangah club te’n buaina an tawk mek.

League thenkhatah chuan club thenkhat te chuan an player te hlawh tih hniam rih an duha, club thenkhat chu inrem tawhin, club thenkhat chu an player te nen inremna an la nei thei lo ve mek bawk.

Tunkar khan English club Birmingham chuan an player, kar khata pound 6000 chin leh a chunglam la lut te chu coronavirus avangin thla li chhung an hlawh chu a chanve vela tih hniam tir an duh thu an hrilha, inremna an neih leh neih loh puan a la ni lo.

PFA chuan heng avanga harsatna tam tak thleng thei sutkian dan leh hmachhawn dan tur sawi ho turin Premier League leh EFL-te chu emergency meeting a neihpui dawn. PFA chuan thuchhuah siamin, “COVID-19 in sum lama harsatna a thlen chungchang sawi ho turin PFA chuan Premier League leh English Football League te chu emergency meeting neihpui turin a ko.

“Sumdawnna dang ang bawkin he COVID-19 avanga buaina hian football lamah pawh sum lamah harsatna a thlen meka, club thenkhat te chuan an player te chu hlawh tih hniam an dil mek tawh. He harsatna hmachhawn tur hian hmanhmawh takin meeting koh a ni a, engtin nge hma kan lak dawn tih chu Premier League leh EFL te nen kan sawi ho dawn a ni,” an ti.