26 Sep 2020 05:32

inkhel

Petronas Yamaha ah Valentino Rossi a lut dawn

Valentino Rossi chu 2021 season-ah pawh MotoGP huangah a la tel dawn a, season tharah Petronas Yamaha rider a ni ang.

Hun eng emaw chen thawm lo awm tawh chu tih chian a ni tawh a, 2021 MotoGP season-ah chuan Valentino Rossi hian Petronas Yamaha bike a khalh dawn a. Vawi 7 ngawt world champion lo ni tawh hian factory bike a la khalh thei zel dawn a ni.

Italian rider ropui hi Monster Energy Yamaha atanga a chhuah hunah chuan Fabio Quartararo chuan a hmun ruak a luah dawn niin an sawi a. Kum thar February thlaah Rossi chu kum 42 a ni ve tawh dawn a, chuti chung chuan bike intlansiak chu bansan a la tum lo hle a, 2000 kuma MotoGP huanga a luh tirh atang khan hnung lam a la hawi leh miah lo a ni.

Rossi chuan, “Thutlukna ka siam hma hian ngun takin ka inngaihtuah nasa a. Ka tan chuan chona hi a hautak tial tial a, a khirh telh telh tawh mai si a, ngaihdan siam thiam pawh a harsa khawp mai a. MotoGP huanga a chungnung pawl ni thei zel tur chuan theihtawp tak meuh chhuah a ngai a ni,” a ti.

“Ni tin theihtawp chhuahin training neih a ngai a, thawhrim a tul hle a, taimakna zawng zawng sawm khawm loh chuan tih ngaihna a awm lo a. Heti taka thawhrim a ngai chung hian bike intlansiakna huanga la tel zel hi nuam ka la ti a, la tel ve zel hi ka duh a ni,” a ti bawk.

A sawi zelnaah, “Kumin kum chanve hma lamah khan ngaihdan nghet ka nei chho a, Yamaha nen kan inbia a, kan inbe rem thei hlauh mai a. Anni pawhin factory team lamah ka tan hmun a awm thei lo a nih pawhin factory bike leh factory support min pek an tiam a ni,” a ti.

Petronas Yamaha boss Razlan Razali chuan nikuma Qatar MotoGP atanga bul tan ve chauhin Valentino Rossi te meuh an la lut thei tur chu lawmawm a tih thu a sawi.

Razlan Razali chuan, “Valentino Rossi hi rider ropui em em mai, tawn hriat pawh nei tha tak mai a ni a, kan team in kan la lut thei hi a lawmawm kan ti khawp mai a. A hnen atang hian thil tam tak kan zir chhuah theih ngei kan ring tlat a ni,” a ti.