26 Mar 2019 09:59

inkhel

Petra Kvitova vittu kum 8 an tantir dawn

Hman kuma Petra Kvitova vittu chu Czech Republic rama court chuan thiamloh a chantir a, kum 8 chhung tan ina tang turin a chungthu an rel.

December 2016 khan Prostejov khuaa a chennaah Petra Kvitova chu Radim Zondra chuan tui tihlumna chu enfiah a ngaih thu sawiin a luhchilh a. In chhunga a luh hian Zondra chuan Kvitova chu a hnung lam atangin a man a, a hrawkah chuan chemte a chuktuah nghal a. Kvitova hian chemte chu a kut veilam chuan a man a, theihtawp chhuahin a tal chhuak thei hlauh a ni.

Kum 33-a upa Zondra hi thil dang vangin tan inah a tang mek a, Brno khuaa court chuan he thubuai chungchang hi an ngaihtuah a. Judge Dagmar Bordovska chuan Petra Kvitova thil sawi chu a rintlak tak zet nia sawiin, Zondra chu thiamloh a chantir a ni.

Kvitova hi a kut veilam a hliam nasa hle a, zai a ngaih phah hial a. Tennis star hian thla nga chhung vel ngawt chu ngai awh chho leh thei turin a duh a ni.

Thil thlen dan chungchang sawiin Kvitova chuan zing dar 8:30 ah doorbell a rawn ri tih sawiin, kawngka a va hawn chuan Zondra chu hnathawh kawr nen a lo ding niin a sawi a. Tui tihlumna chu a dik chiah lo nia sawiin, en fiah a ngai tih a sawi a ni.

“In chhungah a rawn luh hnu hian tui lum chhuahna chu herh haw turin min ti a, tui herh haw ka tum mek lai chuan min rawn man a, ka hrawkah chemte sei deuh a rawn chuktuah zui nghal a ni,” tiin Kvitova chuan a sawi.

“Rang deuhin ka kut pahnih chuan chemte chu ka man a, ka kut veilam chuan a hriam lai chu ka man fuh a, theihtawp chhuahin chemte chu ka phih tla thei hlauh a. Chhuatah chuan ka tlu a, hawina lam apiangah thisen hmuh tur a awm a ni,” a ti.

A sawi zelnaah, “Chhuata ka mobile phone chu lak tumin ka ban a, mahse Zondra chuan a rawn pet sawn daih a. Damdawi ina ka kal a ngai tih ka sawi a, pawisa a duh leh duh loh ka zawt a. Ka pawisa neih zat min zawt a, 10,000 Czech crowns (£341; $440) ka neih thu ka hrilh a, a lungawina tawk a tling a, pawisa chu ka pe vat a ni,” a ti.

“Pawisa ka pek hnu chuan a chhuak a, a kal liam hnuah ambulance ka ko nghal a, a hnuah police pawh ka ko ve leh bawk a. Chemte ka vawn lai khan na ka hre miah lo a, mahse thisen ka hmuh khan ka vai ruai mai a ni,” tiin Kvitova chuan a sawi.

Police chuan ngawrh takin an chhui zui a, Kvitova chu thlalak hrang hrang an entir a, Zondra thlalak a hmuh veleh a hre thei nghal vat a ni.

Doctor te chuan Kvitova chu tennis khel leh thei turin an ngai lo a, mahse May 2017 khan a inkhel leh tan a, 2019 Australian Open final a lut leh thei hial a ni.