Australian Open 2019 mipa singles final-ah Novak Djokovic chuan Rafael Nadal chu 6-3, 6-2, 6-3 in a hneh a, Australian Open title chu vawi sarih la ta a, Pete Sampras chu a khum ta a ni.

Novak Djokovic leh Roy Emerson te chuan a hmain Australian Open title 6 ve ve la tawhin, record an chelh dun a. Tuna Djokovic a champion leh takah chuan he title la hnem ber hi a ni ta a, Grand Slam 15 a lakna niin, Grand Slam title 14 latu Pete Sampras chu a kalsan ta a, vawi 17 latu Rafael Nadal leh vawi 20 latu Roger Federer te chiah tluk loh a nei tawh a ni.

Tun tum kha Djokovic leh Nadal te an inhmachhawn vawi 53-na niin, Djokovic hi vawi 28 a chak tling chiah a. Mipa tennis khawvela a langsar zual pathum te lakah Djokovic hi a che tha thei viau mai a, Nadal hi vawi 28 a hneh tawh a, Nadal hi vawi 25 chu a chak ve tawh bawk a. Roger Federer pawh vawi 25 a hneh tawh a, Federer hian vawi 22 chu a hneh ve tawh a. Andy Murray pawh vawi 25 hneh tawhin, vawi 11 chu a tlawm zawkah a tang ve tawh a ni.

Australian Open title a lak takah chuan Djokovic hi tun hnua mipa tennis player zingah a zawna major title pathum la thei hmasa ber a ni a. 2018 ah khan Wimbledon leh US Open title te a la bawk a, Australian Open a lak leh chiah hian Djokovic chu Roger Federer leh Rod Laver te chungah a awm thei chiah a. Federer leh Laver te hian a zawnin major title pahnih chu an lo la ve tawh a ni.

Kum 4 chhunga a vawi khatna atan Rafael Nadal chu Grand Slam match bikah straight set-a a tlawm hmasak ber a ni a, major final 25 khelhah set la miah loa a chak loh hmasak ber a ni bawk a. Hetiang a tawn hnuhnun ber chu 2015 kha niin, French Open quarter final-ah Djokovic bawk hi a hneh lo a ni.

Kumin final khan darkar hnih leh minute 4 chiah an khel a, Novak Djokovic leh Rafael Nadal te inkhelah chuan a rei loh ber tum a la ni a. 2015 khan Roland Garros-ah darkar hnih leh minute 26 an inkhel a, tun tuma an inkhel hian a khum chiang hle.