06 Dec 2018 10:13

inkhel

Peta 2018 Person of the Year ah Lewis Hamilton

Peta chuan Formula 1 champion Lewis Hamilton chu 2018 Person of the Year atan an thlang.

Ran humhalhtu pawl lar tak Peta chuan Mercedes driver Lewis Hamilton chu sa a ei ngai loh piah lamah, sa ei ngai lote chu khawvelah pawh a langsar pawl an nih theih zia lantirtu a nih avangin he chawimawina hi an hlan a ni.

2018 Formula 1 world champion Hamilton hi ramsa humhalh kawnga phusa ve tak mai a ni a, hetiang lama hma a lak nasa hnuah hian sa pawh a ei loh phah nia sawiin, a nunphung pawh a thlak danglam phah hial a ni.

Hamilton hi Peta in 2018 Person of the Year atana an thlan bakah BBC Sports Personality of the Year Award dawng thei turin an chhawp chhuak bawk a. BBC chawimawina dawng thei tur hian Hamilton bakah Harry Kane leh Geraint Thomas te nen an thlang chhuak a, kuminah Hamilton hian a dawng leh a nih chuan he chawimawina hi vawi hnih a dawnna a ni ang.

British driver Lewis Hamilton hian a Instagram account-ah ramsa humhalhna lampang thu ziak a tarlang nasa hle a, a phak ang tawkah hetiang lam hmalakna hi a thlawp tha hle.

Peta dintu Ingrid Newkirk chuan Lewis Hamilton hi a fak hle mai a, Instagram lamah follower a ngah a, hemi hmanga an pawl thil tum te theihtawp chhuaha a theh darh thin avangin an pawl tan chuan a tangkai hle tih a sawi.

Person of the Year chawimawina hi Ricky Gervais, Brian May leh Sir Roger Moore te pawhin a hmain an lo dawng tawh a ni.