09 Oct 2019 05:09

inkhel

‘Pepe, Cristiano leh Mbappe te’n inanna an nei’

Lille sporting director Luis Campos chuan Arsenal winger Nicolas Pepe chu Cristiano Ronaldo leh Kylian Mbappe te nen inanna nei niin a sawi.

Ivory Coast forward Nicolas Pepe chu Arsenal chuan Ligue 1 atangin Emirates Stadium lamah an club record thar siamin €79 million (£72 million/$87 million) zetin an la lut a. Season liam taah khan Ligue 1 goal 22 zet mai a thun theih avangin a lakah hian beiseina an nei sang hle.

Pepe hian England ramah beisei a pha rih lo hle a, Premier League goal khat chiah a la thun a, mi goal thun tur erawh vawi eng emaw zat chu a siamsak ve tawh thung a. Hetiang hi a dinhmun a nih avangin mi thenkhat chuan kum 24-a upa Pepe hi man to taka lei kha a phu chiah lo niin an ngai tan tawh a ni.

Luis Campos chuan, “Ka ngaihdan chuan footballer ropui leh tha tak tak chuan football khelh hi nuam an tiin an ngaina tur a ni a. Pepe pawh hi chutiang huanga awm chu a ni ngei a ni,” a ti.

“Cristiano Ronaldo leh Kylian Mbappe te hi ka lo thawhpui ve tawh a, anni pahnih hian football chungchang chu an hre em em mai a, hriat loh an nei lo tih theih hial a ni ve ve a. Mbappe chuan France rama second division result pawh a hre thei vek zel a ni,” a ti bawk.

A sawi zelnaah, “Nicolas Pepe pawh hi Mbappe ang chiah hi a ni a, football ngainatu dik tak entirna pawimawh tak a ni ve chiah a. Inkhelh zawh chiahah pawh kha inkhel kha vawi hnih chu a en tluanchhuak leh peih a, a khelh dan kha en nawnnin, a hma aia tha zawka khel thei tura insiam that a tum thin,” a ti.

“Khawvela footballer ropui ber tia sawi ve thin Cristianto Ronaldo pawh hi a khelh tawhnaa a tih fuh loh deuhte atangin a inzir belh leh a, a hma aia tha zawka khelh theih hi a tum ber a ni thin a. Khatiang rilru kha Pepe hian a pu ve chiah bawk a, hei vang hian Cristiano leh Mbappe te nen hian an inang tlang a tih loh theih loh,” tiin a sawi.

Arsenal boss hlui Arsene Wenger pawhin Pepe chu a tan viau a, “He player hi ka duh riau a, Arsenal-in an lei pawh hi an tifuh hlein ka hria,” a ti.

“Tunah chuan Premier League boruak milin a la inher rem thei reih lo a, hun pek ve deuh a la ngai a. France rama zalen taka a khelh ang khan a la khel ve thei chiah lo niin a lang a, chutianga a tih theih hunah chuan a danglam tawh viau tura ngaih a ni,” a ti bawk.