Bayern Munich CEO Karl-Heinz Rummenigge chuan an manager hlui, tuna Manchester City manager ni mek Pep Guardiola khan Bayern goalkeeper Manuel Neuer kha midfield-a khelh tir chhin a chak thu leh khelh tir chhin a tum hial thu a sawi.

Neuer hi tunlai goalkeeper zingah chuan ball thiam ber tih hial theih a ni a, goalkeeper ni chungin ‘sweeper’ angin a khel tel thin a ni bera, Guardiola-a’n midfield-a khelh tir a chak mai pawh hi a awm lo lem lo a tih theih awm e.

Guardiola hian kum 2013 atanga kum 2016 chhung khan Bayern Munich hi a enkawla, hemi hun chhung hian Bundesliga title pathum, DFB-Pokal pahnih, UEFA Super Cup pakhat leh FIFA Club World Cup vawi khat chawi hmanin Neuer hi a first-choice goalkeeper a ni.

Bayern CEO Rummenigge chuan, “Manuel hian goalkeeper ni chunga footballer nih tel bawk hi a hmuchhuak a, he position hi a ma tih chhuah liau liau a ni. Ka thil la hriat reng chu Pep Guardiola khan Bundesliga-a kan champion fel tawh hnu khan game khat kha chu midfield-ah Manuel kha khelh tir a tum nghe nghe a ni.

“Mi mitmei kan ven avangin Pep-a thil tum kha kan ti hlawhtling ta lova, mahse a ngaihdan kha a dik lo ka tih sak thei lo. Manuel kha midfield-ah khelh tir ta ila a khelh chhiat ka ring hauh lo a ni,” a ti.