Manchester City captain Vincent Kompany-a’n Etihad Stadium-a a contract neih lai chu tun season zawh rual hian a zo ve dawn a, tun thlengin contract thar a la ziak lo.

Kum 2008 khan Kompany hian German club Hamburger SV atangin City hi a zawma, Premier League champions tan game 338 a khel tawh. Inhliam hrat ve tak a ni a, player tha tak niin a dam phawt chuan manager-ten an chhawr rin thin hle.

City manager Pep Guardiola chuan season zawh rualin Kompany chu chhuak lo se a tih thu leh City-ah cham zela tura a duh thu sawiin, “Kompany hi kan captain a ni a, City-ah kum 11 a awm tawha, la cham zel se ka ti hle.

“Inhliamna a nei leh zeuh thin avangin duh angin a khel tam thei lova, kan game hnuhnung pahnihah pawh chu chu langin pakhat zawkah chiah a inlan thei. City defender-te zingah Aymeric Laporte chiah hi Kompany aia ke veilam hmang thiam an awm. Centre-back te hi tha veka mahse Kompany hi chu a ‘sial’ bik a, centre-back ka hmuh tawha tha ber zinga mi a ni,” a ti.

Guardioloa hian centre back hrawl tak tak a lo enkawl tawh thin a; Carles Puyol, Gerard Pigue, Mats Hummels leh Jerome Boateng-te lo enkawl tawhin, anni huangah hian Kompany pawh a dah ve niin a lang.

Kum 32 mi Kompany hi Hamburg leh City tan a khelh bakah hian club dang pakhat tan chiah a la khel a, Belgian club Anderlecht chhul chhuak niin, Anderlecht-a a carrer bul a tan. Belgium player pawimawh niin, Belgium tan hian game 87 lai a khel tawh bawk. City-ah hian a hlawhtling hle a, City tan hian Premier League title pathum, FA Cup pakhat, League Cup pathum-te a chawi tawh a ni.