Copa America khelh mekah Inrinni tuk khan Argentina chuan penalty shootout hmangin Colombia an hneh a, semi-final an lut.
He inkhelah hian kawng engkimah Argentina an chungnung zawk a tih theih a, mahse an mamawh goal an khung thei lo va Arsenal keeper David Ospina an paltlang zo lo.
Ospina hian Sergio Aguero, Lionel Messi leh Nicolas Otamendi-te tih goal tur tha tak takin a dang a, inkhel pumpuiah Argentina hian 61% ball an chang.
Hun pangngaiah goal a lut lo va, Copa America quarter-final emaw semi-final-ah hian extra-time an khel ngai lo va penalty shootout hmanga chak zawk zawn nghal thin a ni.
Colombia-in pet hmasain Real Madrid midfielder James Rodríguez chuan a pet goal nghal a, Argentina tana pet hmasa bertu Barcelona forward Lionel Messi pawhin a pet goal zui ve bawk.
Radamel Falcao-a'n a pet goal hnuin Ezequiel Garay chuan Argentina tan a sut veleh a, Juan Cuadrado pet goal pawh Argentina tan Éver Banega chuan a sut zui veleh mai abwk.
Colombia tan penalty vawlina pettu Luis Muriel a chesual a, goal kham chungah ball a thlawhchhuak nulh! Argentina tana pettu Ezequiel Lavezzi chuan a hlah ve lo va 4-3 in hma an hruai.
Colombia tan Edwin Cardona chuan a pet goal veleh a, Argentina tana pettu Lucas Biglia chuan a thelh ve thung a 4-4 a ni chhunzawm.
Biglia hnu hian Colombia tan Juan Zuñiga chuan a thelh veleh bawk a, Argentina tan Manchester United defender Marcos Rojo chuan a pet goal bik lo.
Boruak a sang a player-te an zam deuh ni pawhin a hriat.
Colombia tan Jeison Murillo chuan petin goal kham chunga ball a thlawhchhuak a, Argentina tan Boca Juniors striker thar ni mai tur tawnhriat ngah tawh Carlos Tevez chuan a pet goal a 5-4 in Albicelestes an chak.
Argentina hian semi-final-ah Brazil leh Paraguay inkhela chak zawk zawk an hmachhawn ang.