Anthony Davis zarah Pelicans chuan Warriors an hneh a, playoff series an khelh mekah beiseina an nei thar ve leh ta.

New Orleans Pelicans leh Golden State Warriors inkhelah hian Anthony Davis chuan point 33 a thun bakah rebound 18 leh steal 4 a nei a, Pelicans chu 119-100 in a chakpui a. Defending champion Golden State hian 2-1 in hma an la hruai ta tho a ni.

Warriors hi a hnufual zawka an tan chang pawhin an khingpuite nen an inkar zau lutuk tizim leh vat thin tia sawi an ni a. Mahse, Pelicans nen an inkhelh tum hi chuan an beisei angin thil a kal vek bik lo a. Point an va score pawhin Pelicans chuan an rawn chhang let ve leh zel a, an inthlauhna chu point tlemte chauh a ni zel mai a. 3rd quarter-ah phei chuan point 25 in an um zawk a, 4th quarter-ah pawh point 26 in an hnufual zawk a ni.

Golden State hian 3-points chu vawi 31 ngawt thun an tum a, heng zinga vawi 22 chu an thun lo a, vawi 9 chauh an thun thei a. An shooting percentage pawh 38% (vawi 92 ah vawi 35) chauh a ni.

Klay Thompson chuan Golden State Warriors tan a thun hnem ber a, point 26 a score a. A khup a tihnat vanga thla khat chuang a chawlh hnua rawn kir leh, Stephen Curry chuan point 19 a thun bawk.

Jrue Holiday chuan New Orleans tan point 21 a thun a, Ian Clark pawhin a club hlui lamah hian point 18 a thun a, Kevin Durant chuan point 22 a thun bawk a ni.

Pathianni hian Game 4 an khel leh ang.