Kum 50 kal ta, vawiin angah khan Brazilian legend Pele chuan goal 1,000 a thun tling chiah a. November 19, 1969 ah khan Rio de Janeiro khawpuia Maracana Stadium-a Santos leh Vasco de Gama inkhelh tumin he goal hi a thun a ni.
A vanglaia goal 1,000-na a thun chiah hian Maracana Stadium chhunga inkhel entute chuan Brazilian striker ropui an lawmpui zia lantirna atan ding chungin an lawmpuina hi an lantir a ni.
He goal chhinchhiahtlak tak mai hi penalty hmanga Pele hian a thun a ni a, Santos penalty hlawh chu petin, Vasco de Gama goalkeeper chuan a lo man thei lo a. He goal a thun chiah hian khelmual chhungah chuan chanchinbumi an tlan lut nghal a, thlalatute lah an bang lo. Pele teammate te chuan an thianpa chu an kokichhuan a, khelmualah chuan an kualpui a ni.
Pele hian an ram Brazil chu 1958, 1962 leh 1970 kumah te FIFA World Cup title a lakpui thei a, tun thlengin hetianga ti thei awm chhun hi a la ni a. Goal 1,000 a thun hian Pele chu kum 29-a upa chauh a la ni.
Goal 1,000 a thun theihna penalty chu sawisel hlawh ve deuh hlek a ni a, tun hnuah Pele chuan hemi chungchang hi sawiin, tunlai angin VAR hmanga ennawn chu ni se penalty kha an hlawh chhuah a rin loh thu a sawi.
He inkhel hi mi 65,157 vel zetin an en a, penalty a pet goal chiah hian Pele chuan ball chu a va chhar a, khelmual lai panin a tlan phei a, ball chu a fawp bawk a. He inkhelah hian Pele te pawl Santos chu 2-1 in an chak a ni.
A vanglai hian Pele chuan game 1,363 a khel hman a, hengah hian goal 1,281 zet chu a thun a. A match khelhah hian Santos-in friendly match an khelh pawh an chhiar tel hlawm a ni.
Santos jersey ha chung pawhin Pele hian goal 1,000 chu a thun tling tho bawk a, July 2, 1972 ah khan Chicago khawpuia Santos leh Universidad de Mexico nen friendly match an khelh tumin Santos tana a goal 1,000-na hi a thun a ni.
Official match bikah chuan Pele hian game 831 khelin, hengah hian goal 767 a thun niin Rec. Sport Soccer Statistics Foundation (RSSSF) chuan an tarlang a, hei hi a dik a nih chuan goal thun hnem lamah chuan pathumnaah a awm thei chauh dawn a ni.
Czech striker Josef Bican chuan a vanglaiin game 530 a khel hman a, hengah hian goal 805 zet a thun hman a, World War II khan a tibuai ta zawk a, heti chung hian RSSSF chhut danah chuan goal thun hnem ber chu a la ni thei dawn ta tho a. 1994 World Cup a Brazil champion puitu Romario khan game 994 khelin goal 772 a thun a, goal thun hnem lamah hian pahnihnaah a awm thei a ni.
Portuguese superstar Cristiano Ronaldo chuan Pele hi a um pha teuh tawh hle a, game 1,018 khelhah goal 724 chu a thun tawh a. Argentine superstar Lionel Messi pawhin game 890 khelhah goal 708 chu a thun tling tawh bawk a ni.