Barcelona midfielder pahnih Pedri leh Frenkie de Jong te chu hun rei tak inhliam avanga an chawlh hnuah Pathianni hian an inlan leh thei dawn.

Pathiannia Atletico Madrid hmachhawn turin player pahnihte hi an inpeih tawh tih Barcelona boss chuan a sawi.

February thla, Europa League-a Manchester United nen an inhnehtawk tum khan, Pedir a inhliam, khami hnu khan a la inkhel leh lo. Spain international hi La Liga-a Real Madrid an hmachhawn tum khan let leh thei tawh tura ngaih a nih laiin, a inhliam belh hlauh.

Pedri-a'n game 11 a hmaih lai hian Barca chuan midfielder De Jong tel loin an lo khel char char bawk a. Pedri-a inhliamna ang thoa inhliamin, De Jong hian an match hnuhnung 4 a hmaih.

"Pedri-a'n min pui dawn, Frenkie pawhin. Player pawimawh leh tangkai tak an ni. Mahse an tel lo pawhin tha takin kan khel thei tho.

"Final third-ah Pedri hi a pawimawh em em a, Robert Lewandowski nen hian an inman fuh em em. Robert-a tan chauh lo pawh, a lo kir leh thei hi a lawmawm hle a ni.

"Hun tha leh pawimawh tak a ni dawn a, tha taka kan khelh a ngai. League-a kan chak lo a nih chuan kan thiam loh a ni dawn.

"Game zawng zawng hi final ang vek a ni tawh a, Atletico hi kan hneh chuan champion turin chance tha tak kan nei dawn. Hun hi kan ngaihhlu tur a ni a, inthlahdah a thiang lo bur.

"Pathianni zana kan game khelh tur hi, a khirh nek dawn. Atleti hi tun dinhmunah chuan league-a team tha ber an ni. La Liga-ah a fit ber an ni bawk," tiin Xavi chuan a sawi.