03 Dec 2019 01:17

inkhel

Pawisa thirah Roger Federer

Roger Federer chu an ramah an chawimawi a, Switzerland ram pawisa thirah tennis superstar lem hi an chuantir a ni.

Switzerland ram pawisa siamtu Swissmint chuan pawisa thir, silver hmanga siam, 20 franc ah chuan tennis player ropui Roger Federer lem chu an chuantir a. Tun tum hi Swissmint in mihring la dam chawimawina atana an pawisa thira an lem an tihlan hmasak ber a la ni.

Swissmint chuan, “Federal Mint Swissmint chuan Roger Federer chawimawina atan pawisa thirah a lem kan tilang a. Swiss pawisa thira mihring dam lai lem kan tihlan hmasak ber a la ni,” tiin Thawhtanniah khan thu chhuah an siam.

20 franc pawisa thir hi December 2 atang khan hman theiha tih chhuah tan a ni a, December 19 thleng hian an pe chhuak dawn a. A vaiin hetianga Roger Federer-a lem chuanna pawisa thir hi Swissmint chuan 55,000 an siam chhuak a ni.

Kum thar lamah khian Federer-a lem lanna pawisa thir chu an siam belh zel dawn a, Swissmint chuan ruahmanna siamin, May 2020 ah khian 50 franc pawisa thir, rangkachakah chuan tlema design danglam deuh hleka tih leh an tum thu an sawi.

Federer chuan, “Hetiang thil ropui tak mai leh chawimawina hlu tak mai min buatsaihsak avangin Switzerland leh Swissmint chungah lawmthu ka sawi,” tiin Twitter lamah a tarlang.

Kum 38-a upa Roger Federer chu Switzerland rama mi mal hriat hlawh ber a tih theih hial ang a. Tour-level title 103 zet a la tawh a, hengah hian Grand Slam title 20, ATP Masters 1000s title 28 te a tel a. ATP Ranking-ah kar 310 chhung chu No. 1 a lo ni tawh a, hei hi record ding lai a ni.

2019 kum tawpah Federer hi No. 3 a ni a, Top 3 ah hian vawi 15 chu a lo awm tawh a, hei hi record thar a ni leh bawk a. Player zinga season tawpa No. 3 ni thei upa ber a ni bawk.

2012 kumah khan Germany rama vawi 10 zet Federer a lo champion tawhna Halle khuaah chuan an kawtthler pakhat chu Swiss legend hming hi an puttir a. 2007 kumah khan Swiss Post pawhin a pianna khua Basel-ah Roger Federer stamp an lo tichhuak tawh bawk a ni.