10 Jul 2019 05:38

inkhel

Pawisa kan hman belh zel dawn: Solskjaer

Ole Gunnar Solskjaer chuan transfer window inhawn hnuah player lei nan sum a hmang ve nual a, sawisel tawk an awm nawk bawk a. United manager chuan pawisa hmang nual tawh mahse hman belh zel an la tum thu a sawi.

Manchester United manager Ole Gunnar Solskjaer chuan tun hnaiah Aaron Wan-Bissaka leh Daniel James te lei nan £68 million a hmang a. Hetiang zat pawisa hmang tura player lar tak ni lo, tlema kum naupang zawk a la ringawt chu an sawisel a, nasa deuha squad siksawi an beisei laia hetiang chauha a che hi mak an tih thu a ri ring hle.

Solskjaer chuan a chet dan sawiseltute chu chhangin, player man to uchuak taka lei tumna a neih loh thu a sawi a. Season hman zawh takah an beisei anga an chet loh thu sawiin, an duh anga an chet that loh hnuah an club sum dinhmun tiziaawm leh thei tura hma lak a duh thu a sawi a ni.

“Football khawvelah hian sumdawnna hi tih fuh tel a ngai hle a, zan khat thil thua chet fuh vak theih a ni lo a, hun rei zawk a duh thin. He club-ah hian player thenkhat chu an rintlak a ni tih hriat chian deuh deuh ka nei a, an hlawhtling chho dawn tih pawh a hriat theih a. Chutiang player chu tun hnaiah pahnih kan la lut a, Dan leh Aaron te hi an ni,” tiin Solskjaer chuan a sawi.

“Aaron Wan-Bissaka leh Daniel James te hi an che rang a, an chak dun hle a, khelmualah tuihalna an nei nasa a, an thiamna te pawh vantlang chunglam a ni a, hei vang tak hian kan tan an la tangkai dawn tih a lang chiang hle,” a ti bawk.

A sawi zelnaah, “Tunah hian player lei tur kan la melh zui zel a, tuna kan lei hi kan duhtawk mai lo a. Player tha kan tih apiang lei ngawt chi a ni chuang lo a, club-in engzat nge an chhiar tih te chu thlir hmasak a ngai thin a. Tuna kan player neih sa ringawt pawh hi a nihna takah chuan tha hlawm tak an ni,” a ti.

Norwegian coach chuan, “Helai hmuna awmte hian hmasawn zel kan duh a, fitness ngawr ngawr a ni ngawt lo a, a hma aia tawh khirh zawk ni thei tur chuan kawng hrang hrangin hma kan lak a ngai a. Season hman zawh takah khan a tir lamah kan chak tluang viau a, a hnu lamah erawh tum angin kan che thei ta lo a ni,” a ti.

“Season thar kan tan leh tawh dawn a, a tir atangin chak chhoh zel kan tum ang a, kan club tantute pawh an phur leh tawh hle a, hlawhtling turin min duh viau hlawm a. Min tantute tana chak chhoh zel hi kan tum ber tur a ni tih ka puang e,” a ti bawk.