24 Feb 2020 07:13

inkhel

Pawisa a awm chuan Conor sawisak leh ka hreh lo: Floyd

Floyd Mayweather chuan pawisa a awm a nih phawt chuan Conor McGregor chu sawisak leh a hreh loh thu a sawi.

American boxer Floyd Mayweather chuan a hmaa UFC fighter Conor McGregor nen an inhnek khan £200 million chuang zet a la lut a. 2017 kuma an inhnek khan Floyd chu a chak zawk a, McGregor pawh a chak lo zawk ni mah se pawisa a hui hnem ve viau tho a ni.

Kum 43-a upa Mayweather chuan McGregor a hneh hnuah boxing ring chhunga lut tawh lo turin chawlh a puang zui a, vawi 50 fight a neihah a chak vek a. 2018 kum hlui thlah niah khan Japanese kickboxer Tenshin Nasukawa nen exhibition match chu an nei leh tho a ni.

Nikum November thlaah khan Mayweather hian a chawlh titawpin boxing ring chhungah a inlan leh maithei niin a sawi a, UFC boss Dana White nen eng event emaw nei thei turin ruahmanna an siam niin a sawi bawk a ni.

Kum khat vel a chawlh hnuah kumin January thlaah khan Conor McGregor chu Octagon chhungah a inlan leh tawh a, American fighter Donald Cerrone chu first round-ah a hneh nghal a. UFC president Dana White chuan Irish fighter chu Khabib Nurmagomedov hmachhawn leh tumin a inpuahchah ngar ngar niin a sawi.

Mayweather chuan McGregor nen an insual dawn khan chuti vakin a inbuatsaih lo niin a sawi a, pushup leh situp vel bak a tih vak loh thu a sawi bawk a. Chuti chung chuan harsa lo takin Irish fighter chu boxing ring chhungah a hneh theih thu a sawi a ni.

“Kan inhnek dawn khan engtin vak mah ka inbuatsaih mumal lo a, chuti chung chuan awlsam takin ka hneh thei a. Pawisa tam tham tak a awm leh dawn a nih chuan Conor McGregor hi ka la sawisa leh peih reng,” tiin Mayweather chuan a sawi.

“Khawi hmunah pawh ka thil tih thin hi ka la ti thei reng a, pawisa min pe dawn a nih phawt chuan ka pen chhuak thei zel a. Chutiang deuh chuan pawisa tam tham tak a awm dawn a nih chuan Conor McGregor hi ka hmachhawn leh hreh miah lo,” a ti bawk.