02 Jul 2019 05:10

inkhel

Paul Gascoigne-a’n Snoop Dogg a cho

Paul Gascoigne chuan Snoop Dogg nen an inkar boruak hun eng emaw chen fuh tawh lo chu tihtawp a duh tawh thu sawiin, a tihtawpna atan boxing ring chhunga chin fel mai tha bera a hriat thu a sawi.

England, Tottenham Hotspur leh Newcastle United legend Paul Gascoigne hi rapper Snoop Dogg chuan Instagram kal tlangin a bei nual tawh a. Snoop Dogg hian hnehsawh deuha a deusawh nual tawh avangin Gazza thin hian a tuar ta meuh lo a ni.

Snoop Dogg chuan Gazza kah nan hian Instagram-ah chuan a thlalak chhe fahran mai chu zu ngawl vei that loh zia lantirna angin a tar chhuak a. Ama thlalak pawh a dah tel a, ganja zuk chu zu in aia tha zawk anga lantirna atan a inhmang thung a ni.

Kum 52-a upa Gascoigne hi tun hma deuh atang khan zu vang hian a tal buai leh thin a, rilru lamah harsatna a nei zeuh zeuh bawk a. Kum 47-a upa Snoop Dogg ve thung chuan ganja a zu nasa viau a, langsar taka buaina erawh sawi tur a nei chiah lo thung.

Hetianga Snoop Dogg-a’n a kah hnu hian Gazza pawhin a kah letna chu Instagram-ah a post ve tawh a. Ui dum hmelchhe ve tak mai, rangkachak thi awrh lai lem niin, hip hop star sam tih dan angin a hmul vel pawh chu an cheibawl a, a hnuaiah, “Morning? Snoop Dogg? Khum atang khan tho chhuak la, i insawizawi a hun tawh e. LOVE GAZZA” tiin a thu a dah a ni.

Gazza hian Instagram-a thlalak a post hnu hian Twitter lamah video hmangin a chhunzawm leh a, ganja zu angin a awm a, “Snoop, Snoopy Dogg, woof, ka rawn pan dawn che ania,” a ti a ni.

An inkar boruak a alh chho tan mek a, Gazza chuan tawngka ringawta inbei reng loin boxing ring chhungah a taka chin fel a duh thu a sawi.

“Spain ramah ka kal a, charity event eng eng emaw kan ti a, chumi hnuah thlawhna panin kan let leh a. Ka Twitter page ka en chuan min beihna vel chu ka hmu a, an lo phusa hle a ni tih ka hre ve chiah a ni,” tiin Gazza chuan a sawi.

“Snoop Dogg chuan min lo bei a ni tih ka hre ve leh hnuhnawh a, eng vanga kei kher chu min bei nge a nih tih ka ngaihtuah nghal a. Kum ruk kalta daihah khan boruak kan lo nei zeuh tawh a, a rawn chhunzawm leh ni maiah ka ngai,” a ti bawk.

Gazza chuan a sawi zelnaah, “Boxing ring chhungah inhmachhawn ka duh a, zu leh ganja inbeihna a ni mai dawn a. A rawn pen chhuak ngam a nih phawt chuan inhnek ngei ka duh. Tun hnuah chuan ka thawk rim hle a, ka huphurh lo khawp mai,” a ti.

“Kum eng emaw zat kaltaah khan ka inenkawlna hmun atangin ka chhuak a, hmabak pawh a eng chho viauin ka hria a. Chutiang karah min lo bei vak mai hi ka ngaithiam vak lo a. Theihtawp ka chhuahna te, harsatna tam tak ka pal tlangte hmu duh loa ni lo taka min bei hi ka pai dam thei mai lo a ni,” a ti.

“A tirah chuan nuih liam mai mai ka tum zet a, a harsa ka ti a, ka nui liam thei ta lo. Min thawng tak meuh a, ka lung hi a awi ngang lo a ni,” tiin Gazza chuan a sawi.