Khawvela milar leh langsar tam takte hi a tir atanga hausa leh khawsa thei an ni bik vek lo va, a bik takin infiamna lama mi langsar tak takte hi chhungkaw harsa tak ațanga lo chawrchhuak an ni nawk hlawm.
Argentina leh Real Madrid forward ropui ni țhin Alfredo Di Stéfano khan, "Kan naupanlaia ka inkhelhpui țhin țhenkhatte khan pheikhawk (ball boot) nei zo ve se chuan kei aiin an lar daih zawk ang." tiin a sawi a, retheihna hian thiamna tha tak tak a hup bo hnem hle ang tih a hriat.
Retheihna hi umbo huphurhawm tak ni mahse hneh theih erawh a ni chiang a footballer tam takte pawhin he retheihna hi paltlangin khawvelah an hming an chher thei. Tuna kan rawn tarlan turte pawh hi retheihna ata football khawvela lo in vawrhchhuak theite an ni.
Diego Maradona (Argentina): Argentina-a khaw lian lo tak Villa Fiorito atangin alo chawr chhuak a, an unau hi pasarih niin pindan pakhat chep takah an cheng ho țhin. Zirna chu an tan ban phak a ni lo va, hak tur mumal thawmhnaw an neih loh bakah pheikhawk bun tur nei lo khawpin an harsa bawk.
An dinhmun a khirh bakah hian Maradona hi a hrisel lo em em bawk a, football chauh hi dam khawchhuah theihna awm chhun a ni tih erawh a hrechiang hle thung. A theihtawpin football a khel chho va a thlen chin chu ziah fe tham a tling tawh.
Ke veilam hmang thiam an sawi apianga sawi hmaih ngai loh tur Maradona hi FIFA Player of the 20th Century-ah Brazilian forward turu ni țhin Pele nen thlan an ni.
Rivaldo (Brazil): Kum 1999-a European Footballer of the Year award dawngtu leh kum 2002 World Cup-a Brazil champion puitu Rivaldo zinkawng pawh hi a bum boh khawp mai.
A naupanlaiin a taksa a chaklo em em a, a cherin a ha (teeth) pawh a tla bal deuh vek bawk. Kum 1989 khan a pa chu lirthei chetsualnaah a boral a, vanduaina tawk țhin mahse a tum ber footballer nih chu a țhulh phah lo va a hlawhtlin zia chu khawvelin a hria.
Antonio Cassano (Italy): Kum 1982 July ni 12 khan Bari-ah a lo piang a, naupang te ala nih laiin pa in a kalsan. A nu enkawlna hnuaiah harsa takin alo thang chho va an chenna țhin San Nicola district lah hmun nuam lo tak a ni bawk a misual an tam thei hle.
A tleirawl chhuah hma chuan Cassano hian tum mumal pawh a nei lo ngai lem lo va, football erawh a ngaina hle thung. An khaw club Bari-ah khelin hma a sawn zel a, AS Roma, Real Madrid, Sampdoria, AC Milan, Inter Milan leh Parma-ah te a khel kual hman a Italy national team tan pawh kum 2003 leh 2014 inkar khan game 39 khelin goal 10 a khung.
Cassano hi player nungchang țha lo ve tak a ni a, neuh neuh a ngah ve thei hle.
Carlos Tevez (Argentina): Manchester United, Manchester City leh Juventus forward hlui pawh hian nuamsa takin a panlai nun a hmang bik lo.
Argentina khawpui Buenos Aires hnaiah awm Ciudadela khuaah kum 1984 February ni 4 khan a piang a, a pianna hmun hi dan mumal hman theihlohna hmun ''Fuerte Apache'' kianga awm anih vangin a hminglemah "El Apache" an vuah.
A nu leh pa diktak Fabiana "Trina" Martínez leh Juan Alberto Cabral-te'n an enkawl lo va, a nu unaunu Carlos Alberto Martínez-te nupa in an enkawl seilian.
An chhungkua hi an harsa ve thei hle a Tevez hian football a ngaina e em bawk. A nghawng leh beng dinglam a ser (scar) awm hi a naupanlaia tui so in a buakna a ni a, hei vang hian thla hnih dawn damdawi inah enkawl a ni.
Boca Juniors a zawm tirhin a ser hi tih rehsak an tum a Tevez hian a hnar. A hnar chhan hi a tunhma nun leh tun thlenga a nun hrilhfiahtu niin a sawi.
Robert Douglas (Scotland): Leicester City leh Celtic goalkeeper hlui hian a hringnunah harsatna tam tak a tawk chho ve a, a beidawng ngai hauh lo.
Scotland national team leh Celtic tan khel pha mahse a club hmasa ber Forth Wanderers-a a awmlai chuan 'Mistiri' ang deuh a ni a Leirawhchan (Brick) remtu a ni pah țhin.
Forth Wanderers a chhuahsan hnu hian club hrang hrangah a khel kual a Celtic hi Scottish Premier League (SPL) leh Scottish Cup-ah vawithum ve ve a champion pui.
Garrincha (Brazil): Khawvela ball chawh hneh ber an ti hial țhin Garrincha hming diktak hi Manuel Francisco dos Santos a ni teh duah a, kum 1993 October ni 28 khan Brazil-a khaw pakhat Pau Grande-ah alo piang.
A pa in zu a heh mai bakah a rualpui te aiin a te fal țhin bawk a, hei vang hian a unaunu Rosa chuan sava te tak "Garrincha" hming hmehbelin a nau hi "Garrincha" tiin a ko va hei hi khawvelin a hriatdan pawh a ni zui ta zel.
Kum 14 mi anihin an khuaa thil siamna hmun factory-ah a thawk țhin a, footballer țha zawngtu (scout) ho in hmu fuh fo mahse an duhthusam a tling ngai lo va hei vang hian kum 20 a tlin hmain professional football a khel lo.
Kum 1953 khan Botafogo-in an lalut a hetih lai hian nupui a nei tawh a kum 20 mi a ni der tawh bawk. Botafogo ațang hian a football zinkawng a in țan chho va, Corinthians, Portuguesa Carioca, Atletico Junior, Flamengo leh Olaria-ah te a khel leh a kum 1958 leh 1962 khan FIFA World Cup-ah Brazil a champion pui.
Roberto Carlos (Brazil): A hmingpum Roberto Carlos da Silva Rocha ni deuh duah hian kum 1973 April ni 10 khan khawvel eng a rawn hmu țan a, chhungkaw awm thei tak ațanga lo chawrchhuak a ni bik lo.
A naupanlai chuan kelawngin an inkhel țhin a, an ball hman lah boruak (air) hmanga puar ni lovin vaivut hmanga hnawhpuar a ni țhin thung. A naupanlai bawk hian a pa nen huan/lo (farm)-a hna thawhna khawl (machine) an nam/pawt țhin a, hunrei tak chhung a pa hi a pui.
Beidawng lovin a ngainat em em football a khel chho va footballer-in an chawi theih zawng zawng chu a chawi kim deuh thaw a, khawvela club țha berte zing ami (Real Madrid)-ah khelin khawvel football-a ram tawh khirh em em Brazil tan vawi za chuang a khel pha bawk.
Steve Savidan (France): Savidan hi hria kan tam lo maithei a, nuamsa taka football khel chho a ni bik lo.
A club hmasa ber chu Angers a ni a, Angers a chhuahsan hnu hian LB Châteauroux, AC Ajaccio, AS Beauvais, AS Angoulême, Valenciennes FC leh Caen-ah te a khel kual leh a kum 2009 khan a Lung lam chianloh vangin inkhelh a chawlhsan.
Savidan hian kum 2008-2009 season khan Caen tan French Ligue 1-ah goal 14 khung a, Caen hi division hniam lamah an tla thung. A chetțhat vang hian AS Monaco-in lakluh an tum a inremna siam vek tawh mahse a Lung lam chianloh vangin inkhelh a chawlhsan lo thei lo.
AS Angouleme-a a khelhlai hian thawmhnaw bal lakhawmtu a ni țhin a, Bar-ah a thawk pah țhin bawk. 2008-09 season-a a chetțhat vang hian France national team tan khel turin kohna pawh a dawng a, France national team tan hian game khat a khel.
Julio Ricardo Cruz (Argentina): Julio Cruz ti a hriatlar zawk hian kum 2003 leh 2009 inkar khan țha takin Inter Milan-ah a hun a hmang a, Italian club hi Serie A-ah vawili champion puiin Coppa Italia-ah vawihnih a champion pui bawk.
Football-a a hlawhtlinna kawng hi a dangdai reuh a, a vannei pawh a tih theih awm e. An khawsak a harsat ve viau avangin hna pawh a tleirawl chhuah tirh lamah hna a thawk țhin.
Argentine club Banfield-ah khelmual enkawltu niin a awm a, ni khat chu Banfield coach-in an player pakhat awm loh vangin practice match-ah a khelh tir ve tawp a hetah hian che țhain contract an ziahpui zui nghal.
Cruz hian kum 1997 khan South America chhuahsanin Dutch club Feyenoord a zawm a, hemi hnu hian Bologna, Inter Milan leh Lazio-ah te a khel kual lehin kum 2010 September ni 10 khan inkhelh a chawlhsan.
River Plate striker hlui hian kum 1997 leh 2008 inkar khan Argentina national team tan game 22 khelin goal thum a khung.
Grafite (Brazil): 2008-2009 season Bundesliga-a goal khung hnem ber ni thei hi kan la hre fur awm e. A pianpui hming erawh Edinaldo Batista Libanio a ni daih a chhungkaw harsa ațanga lo chawrchhuak a ni.
Grafite hian kum 22 mi anihin professional football a khel chauh a, a hun hmalamah chuan in tin kikin bawlhhlawh paihna bag a zuar kual țhin. Harsain sum thawkchhuak hram hram țhin mahse a football thiamna in kum 2001 khan eizawnna a siamsak țan a, Ferroviaria chuan lalutin professional football a luhchilh țan chiah.
Kum 2007 nipui transfer hun inhawn lai khan French club Le Mans chhuahsanin VfL Wolfsburg a zawm a German club-ah hian khawvel hriatah a invawrh lar.
2008-2009 season khan Bundesliga-ah goal 28 khungin goal khung hnem ber a ni a, Wolfburg hi khawvel awm hnua a vawikhat nan Bundesliga-ah a champion pui.
Wolfsburg a chhuahsan hnuin United Arab Emirates (UAE) lamah a kal leh a tunah hian an ram Brazil-ah awmin Atletico Paranaense tan a khel mek.