Infiamna (Sports)-ah hian thlengsang tur chuan zaidamna leh dawhtheihna a pawimawh em em a, mi tam takin he thil pahnih hi an neihloh vangin an thiamna phu ang an thleng lo țhin.
Chanchin țha lam aia chanchin chhe lam ngah zawk mah Joey Barton pawh hi zaidamna leh dawhtheihna nei lo zinga langsar tak pakhat a ni a, in thunun thei deuh hlek se chuan tun ai hian khawvelah a lar zawk ngei ang.
A khelhna (position) hi midfied a ni a, a thinchhiat mai bakah a kawlh hle a pa zaidam a ni lo. A khelhna apiangah buaina a siam emaw tih mai tur a ni a, a kal zau poh leh buaina a nei zau tih theih a ni.
Hetiang boruak kara tal vel hi ni mahse chanchin ngaihnawm deuh deuh a hnutchhiah thung...
1. ENGLAND TEAM A KAP : 2006 World Cup-ah khan England squad-ah khan a tel ve lova, hei hi ala na deuh niin a lang a ngeiawm takin a țawngchhuak.
Hemi World Cup hma hian Frank Lampard chuan a chanchin ziahna lehkhabu a tichhuak a, Barton hian lehkhabu hi keng chungin Three Lions hi a kap a England player-te'n sum siam nan anmahni chanchin ziahna lehkhabu an chhuah pawh a helh hle.
Barton hian, "England khan World Cup-ah engmah an ti lo. Anih engvangin lehkhabu an lekchhuah fur si? 'Quarterfinal-ah kan tla a mi mawl ang maiin kan khel bawk. Hei lehkhabu chu le.' Tunge chhiar ve duh?" tiin a sawi.
2. A ENGLAND TEAMMATE-TE NEN HMAICHHANAH AN INHMU : Kum 2007 khan England tana khel turin koh a ni ve a, a teammate-te a hmuh hmasak ber chuan heti hian a in hmelhriat tir a, "Hey țhiante u, Joey ka nia. Keima chanchin ziahna chungchang......." tiin a țawngchhuak deuh kher.
3. LIVERPOOL-AH LIRTHEI KHALHTU A TIBUAI : Liverpool-a vantlang hman chi lirthei (cab) radio chu a tichhe hmiah mai bawk. Hei hi a chhan chu Barton hian McDonald dawr lama kal a duh a, mahse driver-in a hnial vang a ni. Hemi țum hian man a ni a, mahse bail-a chhuahtir niin thubuai liantham a nei zui lo hlauh.
4. MEDIA HMACHHAWN AN PHALSAK LO : Manchester City-a a khelhlai khan an manager Stuart Pearce chuan a lakluh kha thil pangngai ve mai anih thu leh Man City fan chu nise pawisa chawi a an club inkhel a en peihloh tur thu a sawi a. Stuart Pearce chuan, "Joey hian a ngaihdan a sawi ve mai a ni." tiin a sawi a hemi hnu hian thuthar lakhawmtute hmachhawn an phalsak lo zui nghal. Enkawl thiam angai viauin a rinawm.
5. INSUAL VANGIN JAIl-AH KHUNG A NI : Kum 2008 May thla kha bar pakhatah an in tibuai a, Barton hian mi pakhat chu vawi sawm hnih chuang a hnek a, kum tling lo mipa naupang pakhat chu a ha a hnek balh sak bawk. Hemi vang hian thla ruk chhung Jail-ah tan tir a ni.
6. PEDERSEN THINAH A HNEK : Newcastle United-a a khelh lai kum 2010-2011 season khan Blackburn nen an inkhelh țumin Blackburn winger Morten Gamst Pedersen thinah a hnek pek a, mahse hei hi official-te chuan an hmu lova inkhelh laiin an hrem lo. FA chuan Barton hi thubuai an siamsak zui a game thum chhung khel thei lo turin an hrem.
7. ALAN SHEARER PAWH A ZAH LO : Kum 2011-2012 season tawp nia Manchester City nen an inkhelh țumin Barton hian Man City striker Tevez chu a kiu in a nghawk lui a, red cad pek a ni.
Khelmual a chhuahsan hma in Sergio Aguero chu a khupah a pet lui leh a, Man City captain Vincent Kompany pawh a lu in tauh a tum nghe nghe. Khelmuala lut ve lo amah ang deuha thinchhia Manchester City striker Mario Balotelli nen pawh an in tawng zui chiam.
He inkhelah hian Man City hi chakin League-ah an champion zui a. Hemi țuma Barton chetdan hi Newcastle United player leh manager hlui Alan Shearer chuan a sawisel a. Barton-a'n a pai dam mai mai lo. "Engahmah a thusawi kha ka ngai thlawt lo va ka ngainep. Mangtha u." tiin Twitter lamah a tarlang.
Barton hian Shearer hi a mil lo sa hrim hrim a, England striker hlui hnuaiah hian kum 2009 khan Newcastle United-ah rei vak lo a awm. Hemi kum May ni 3 hian Liverpool an hmachhawn a Barton hian hlauhawm taka The Reds midfielder Xabi Alonso a tlawh vangin red card a hmu a, an manager Shearer hi a lawm lo hle.
Inkhel zawh hnuah Shearer hian Barton hi hauvin a titi pui a, inkhel turin a inpeih tawh emaw a tih laia Red card pek ngai khawpin a che hi a lungawi lo hle.
Barton hian ngaithla liam mai lovin an manager hi a hnial a an team-a player țha ber a nih thute sawiin Shearer hi manager nep leh tum mumal nei lo tiin a țawng zui chiam.
Hetih lai hian Premier League-ah game khelh hmabak pathum chiah an nei tawh a, player mamawh a san lai tak a ni a Barton red card hmuh vang hian Shearer hi a thinrim.
Hetia manager nen an in tih buai hnu hian Barton hi tiam chin nei lovin Newcastle hian an chawlhtir (suspend).
8. A KHELH MEKNA NEWCASTLE UNITED A SAWISEL : Newcastle United-a a awmlai khan West Ham lamah Newcastle chuan Kevin Nolan an hralh a, hei hi Barton-a ngaihdan a ni vak lo ni tur a ni an club thu neitute chu a sawisel chiam mai a, a hranin an training tir tawp.
9. TRAINING-NA AH A TEAMMATE OUSMANE DABO A SAWISA : Manchester City-a a awm lai (2006-2007 season) khan an training-na ah a teammate Ousmane Dabo nen an in tibuai a, Barton hian kut a thlak na hle. Dabo sawidan chuan Barton hian vawi tam tak kut a thlak a, nikhaw hre lovin a awm a chumi hnu chuan damdawi in panpui a ni.
Dabo hian a luah hliam a nei nual a, Barton hian a mit veilam a tihchhiat sak țep bawk. Hemi vang hian Man City chuan Barton hi £100,000 an chawitir bakah season tluana khel thei lo turin an hrem.
Kum 2008 July thla khan Dabo-a court senso £3,000 chu tum turin Barton hi tih a ni a, thla li chhung jail-a tan leh dar kar za hnih vantlang tana hnathawk tur a thiamloh chantir a ni bawk. FA pawhin hemi țum hian na takin an hrem ve bawk a, £25,000 an chawitir mai bakah game ruk inkhel thei lo turin an hrem.
10. PRE-SEASON NEIHLAIIN THAWN HAW A NI : Kum 2005 nipui lai khan khan Manchester City chu Thailand-ah pre-season neiin an zin a, hemi țum hian Everton fan kum 15 mi mipa naupang chu kut a thlak a England lamah thawn haw a ni.
11. CAR-IN MI A SU : Kum 2005 May thla khan Liverpool khuaah a car-in a lengchhuak a, zing dar hnih velah ke a kal kum 35 mi a su a, a mi sut ke hi a tliak.
* Hemi chin hi ni phawt se, karleh lamah Part 2 kan lo tichhuak ang.