Trinamool Congress MP Prasun Banerjee chuan Nilaithawhtan khan Parliament kawtah football a pet a, sawi a hlawh hle.

Prasun Banerjee chuan India rama football dinhmun a ziaawm theih nan hma lak a tum a, mi rilru a lak theih nan Parliament hung chhungah hian football hi a pet a. Footballer thin Banerjee hian Prime Minister Narendra Modi chu ram pumpuia football chawisang turin a ngen a ni.

"Prime Minister leh Sports Minister te hnenah India rama football dinhmun chawisang tura hma la turin ka ngen dawn a. Ram chhung mai ni loin, khawvel huapah pawh kan ram hian hriat a hlawh theih nan hma lak ka duh. Hetiang ti tur hian politics a inrawlh a ngai lo a, keimahni zawk hi politics chunga kan len chuan kan ti thei daih zawk dawn a ni," tiin MP Prasun Banerjee chuan a sawi.

Engtikah emaw India chuan FIFA World Cup an la khelh theih ngei a beisei thu sawiin, "India hian World Cup hi kan la khelh theih ngei ka beisei tlat a, a hmuna en thei lo pawhin TV atangin kan la en ve theih ka beisei a. Hetiang dinhmuna din theih ngei hi kan tum dawn a. Hemi chungchangah hian Prime Minister pawh ka hmu ang a, ka la sawipui dawn a. Politics ni loin football zawk kan khel ang," a ti.

Prasun Banerjee hian India sorkar chu football ngaihsak tak tak loah a puh a, an ngaihsak ve dan ber pawh politics khelhna atan chauh a nih thu a sawi.

Parliament hung chhunga Mahatma Gandhi lim hmaa football a pet chhan bulpui sawiin, mi thinlunga football-in hmun a luah theih zawkna atan a nih thu sawiin, All India Football Federation (AIFF) president Praful Patel chuan kan ram chhunga football chawisang tura hma a lak that loh em avangin cho chhuah theih a tum thu a sawi bawk.

Banerjee hi Lok Sabha-ah Howrah constituency aiawhin thlan tlin a ni a, 1979 ah khan Arjuna Award a lo dawng tawh a. India football team captain a ni thin a, ram leh ram inelna hrang hrangah te India team chu a lo kaihruai tawh a ni.